Quryltaı depýtattaryn saılaý: BAQ pen onlaın-platformalarǵa qoıylatyn talaptar jarııalandy
ASTANA. KAZINFORM — Qazaqstan Respýblıkasy Mádenıet jáne aqparat mınıstrligi 2026 jylǵy 23 tamyzda ótetin Qazaqstan Respýblıkasy Quryltaıy depýtattarynyń saılaýy kezindegi buqaralyq aqparat quraldary men onlaın-platformalardy paıdalanýshylarǵa saqtalýǵa tıis zań talaptaryn eske saldy.
Mınıstrliktiń málimetinshe, partııalyq tizimderdi usyný 2026 jylǵy 13 shilde saǵat 18:00–ge deıin, al olardy tirkeý 23 shilde saǵat 18:00–ge deıin jalǵasady. Saılaýaldy úgit-nasıhat jumystary tirkeý kezeńi aıaqtalǵannan keıin, ıaǵnı 23 shilde saǵat 18:00–den soń bastalady.
Zań talaptaryna sáıkes, barlyq buqaralyq aqparat quraldary saıası partııalardyń partııalyq tizimderin usynýy men olardy tirkeý týraly aqparatty teń kólemde jarııalaýǵa mindetti. Bul talap saqtalmaǵan jaǵdaıda ákimshilik jaýapkershilik qarastyrylǵan.
Sondaı-aq BAQ pen onlaın-platformalar tirkelgen kandıdattar men partııalarǵa úgit materıaldaryn tek shart negizinde ornalastyra alady. Bul talap saıası partııalar men kandıdattardyń ózderiniń resmı ınternet-resýrstary men áleýmettik jelidegi paraqshalaryna qoldanylmaıdy.
Mınıstrlik onlaın-platformalardy paıdalanýshylardyń qarjylandyrýdy qajet etpeıtin jeke pikir bildirýine zańmen tyıym salynbaıtynyn atap ótti.
— BAQ pen onlaın-platformalar 2026 jylǵy 18 shildege deıin úgit materıaldaryn ornalastyrý quny men sharttary týraly aqparatty jarııalap, ony Qazaqstan Respýblıkasynyń Ortalyq saılaý komıssııasyna usynýy tıis. Eger BAQ áleýmettik jelilerdegi resmı akkaýnttarynda úgit materıaldaryn jarııalaýdy josparlasa, bul akkaýnttar týraly málimetter de OSK-ǵa berilýi qajet, — delingen habarlamada.
Úgit materıaldaryn ornalastyrý tek OSK-da tirkelgen partııalarmen jasalǵan sharttar negizinde júzege asyrylady jáne olardyń talaptary qandaı da bir saıası kúshke artyqshylyq bermeýge tıis.
Sonymen qatar BAQ pen onlaın-platformalar saıası partııalardyń ar-namysy men iskerlik bedeline nuqsan keltiretin materıaldardy jarııalaýdan bas tartýǵa mindetti. Mundaı aqparat jarııalanǵan jaǵdaıda ony tegin teriske shyǵarý talap etiledi.
Saılaýaldy úgit-nasıhat 2026 jylǵy 22 tamyz saǵat 00:00–de aıaqtalady. Zańnamaǵa sáıkes, partııalyq tizimderdi tirkeý aıaqtalǵanǵa deıin, sondaı-aq 22 jáne 23 tamyz kúnderi úgit júrgizýge tyıym salynady.
Mınıstrlik teleradıo habarlaryn taratý sýbektilerine jańalyqtar men taldamalyq baǵdarlamalarda kez kelgen úgit materıaldaryn taratýǵa bolmaıtynyn da eskertti.
Budan bólek, qoǵamdyq pikirge júrgizilgen saýalnamalar men saılaý boljamdaryn jarııalaý kezinde zańda belgilengen talaptardy saqtaý mindetti. Ásirese daýys berýge deıingi bes kún ishinde jáne saılaý kúni mundaı materıaldardy jarııalaýǵa qatysty arnaıy shekteýler qoldanylady. Zań talaptaryn buzǵan jaǵdaıda ákimshilik jaýapkershilik kózdelgen.
Eske salaıyq, buǵan deıin Quryltaı saılaýy qarsańynda partııalar qaı baǵytta jumys isteýi kerek ekenin jazǵanbyz.
