Quryltaı depýtattaryn mandatynan aıyrý tártibi qandaı
ASTANA.KAZINFORM – Májilis depýtaty Aıdos Sarym «Qazaqstan Respýblıkasynyń Quryltaıy jáne onyń depýtattarynyń mártebesi týraly» konstıtýtsııalyq zań jobasy aıasynda Quryltaı múshelerin depýtattyq mandattan aıyrýdyń protsesin túsindirdi.
Onyń aıtýynsha, konstıtýtsııalyq zań jobasyndaǵy mandattan aıyrý tártibi negizinen qoldanystaǵy zańnama tetikterine uqsas.
— Bul partııalyq saılaý bolǵandyqtan, eger depýtat partııanyń usynystaryna qulaq aspasa, partııanyń bedelin túsirse jáne basqa da jaǵdaılar bolsa, bul (mandattan aıyrý) protsesti partııanyń ózi bastaýy múmkin. Sonymen qatar, memlekettik ınstıtýttar aralasqanda, tıisti shara qoldanylýy múmkin. Qylmys jasasa, paramen ustalsa, onda tıisti tártip qarastyrylǵan, - dedi A. Sarym Parlament palatalarynyń birlesken otyrysynan keıin tilshiler suraǵyna jaýap bere otyryp.
Budan bólek ol saılaýshylar tıisti ótinishter arqyly Quryltaı depýtattaryna senimsizdik bildire alatynyn atap ótti. Alaıda, mundaı jaǵdaıda sońǵy sheshimdi partııa qabyldaıdy.
— Eger partııa shynymen de bul depýtattyń jumysyn tıimdi dep sanasa, onyń eshqandaı zańdardy buzbaǵanyn nemese óziniń jeke saıası maqsattaryn kózdemegenin atap ótse, sońǵy sheshimdi partııa jasaıdy. Jalpy alǵanda, bul máseleler partııanyń bedeline tikeleı áser etedi. Saılaýshylar qarsy bolǵanymen, partııa tıisti sheshimderdi qabyldamasa, onda partııa óz reıtınginde utylady, - dedi depýtat.
Budan buryn habarlanǵandaı, búgin Parlament palatalarynyń birlesken otyrysynda «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zań jobasy birinshi oqylymda maquldandy.
Munymen qosa, Parlament palatalarynyń birlesken otyrysynda «Qazaqstan Respýblıkasynyń Quryltaıy jáne onyń depýtattarynyń mártebesi týraly» konstıtýtsııalyq zań jobasy birinshi oqylymda maquldandy.
