Quryltaı depýtattary tolyǵymen proportsıonaldy tásilmen saılanady — Konstıtýtsııalyq komıssııa

ASTANA. KAZINFORM — Memlekettik keńesshi — Konstıtýtsııalyq komıssııa tóraǵasynyń orynbasary Erlan Qarın Konstıtýtsııalyq reforma jónindegi komıssııanyń birinshi otyrysynda Quryltaı depýtattaryn saılaýda qandaı tásil qoldanylatynyn naqtylady.

— Quryltaı depýtattaryn saılaý júıesi týraly aıtsaq, jumys toby tolyǵymen proportsıonaldy tásilge kóshýdi biraýyzdan qoldady. Bul — Memleket basshysy byltyrǵy qyrkúıektegi Joldaýynda kótergen bastama. Sol kezde Prezıdent: «Eger bir palataly Parlament qurý qajet degen ortaq sheshimge kelsek, ondaı Parlamentti tek qana partııalyq tizim boıynsha saılaǵan jón dep sanaımyn. Bul — álemde keńinen taralǵan parlamenttik rásim» degen bolatyn. Proportsıonaldy saılaý júıesi partııalardyń kadrlyq saıasatyn damytyp, ınstıtýtsıonaldyq rólin arttyra túsedi, — dedi Erlan Qarın.

Onyń paıymdaýynsha, bul tásil saıası kúshterdiń qoǵam aldyndaǵy jaýapkershiligin de kúsheıtedi.

— Quryltaı depýtattarynyń ókilettilik merzimi týraly aıtsaq, Memleket basshysy buǵan qatysty ustanymyn Ulttyq quryltaıdyń Qyzylordada ótken otyrysynda aıtty. Ol «Jańa Parlamentte depýtattardy bes jyl merzimge saılaý kózdelip otyr» dep naqty atap ótti. Jumys toby da osy paıymǵa toqtady. Bul merzim bolashaq Quryltaı quramyn jańartyp otyrý turǵysynan tıimdi, ıaǵnı saılaý naýqandarynyń jıiligi jaǵynan alǵanda qolaıly bolmaq, — dedi Konstıtýtsııalyq komıssııa tóraǵasynyń orynbasary.

Aıta keteıik, Jibek Joly arnasy Konstıtýtsııalyq reforma jónindegi komıssııanyń birinshi otyrysyn tikeleı efırde kórsetip jatyr. 

Buǵan deıin Konstıtýtsııalyq komıssııanyń quramynda kimder kirgenin jazǵan edik.