Quryltaı depýtattary kýálikterin qashan alady – OSK jaýaby
ASTANA. KAZINFORM – Quryltaı depýtattaryna kýálikter partııalar mandattardy kandıdattar arasynda bólip, tıisti málimetterdi Ortalyq saılaý komıssııasyna usynǵannan keıin tabystalady. Bul týraly OSK hatshysy Shavkat Ótemisov aıtty.
Onyń sózinshe, saılaý qorytyndysy jarııalanǵannan keıin 5 paıyzdyq mejeden ótken partııalar basqarý organdarynyń otyrystaryn ótkizip, tizimdegi kandıdattardyń qaısysyna mandat beriletinin anyqtaıdy.
– Saılaý qorytyndylary jarııalanǵannan keıin 5 paıyzdyq mejeden ótken partııalar ózderiniń basqarý organdarynyń otyrystaryn ótkizedi. Osy otyrystarda tizimge engizilgen kandıdattar arasynda mandattardy bekitip, bóledi. Óz sheshimderin bizge joldaıdy. Partııalar mandat bergen adamdar týraly derekterdi alǵannan keıin tıisti qujattardy daıyndaýǵa az ýaqyt qajet. Sodan keıin olardy tabystaımyz. Bári partııalardyń basqarý organdarynyń jedeldigine baılanysty, - dedi Shavkat Ótemisov.
Osyǵan baılanysty depýtattarǵa kýálik tabystaýdyń naqty merzimi ázirge belgilengen joq.
Eske sala keteıik, buǵan deıin Quryltaı saılaýynyń sońǵy qorytyndysy jarııalandy.
Sonymen birge, saıası partııalar arasynda depýtattyq mandattardyń qalaı bólingeni de habarlandy.
