Quryltaı depýtattary Astanada 150 túp aǵash otyrǵyzdy
ASTANA. KAZINFORM – Quryltaı Tóraǵasy Aıbek Dádebaı bastaǵan depýtattar «Taza Qazaqstan» jalpyulttyq ekologııalyq aktsııasyna qatysyp, Astanada 150 túp aǵash otyrǵyzdy.
Kógaldandyrý jumystary Ulttyq mýzeı mańyndaǵy Shámshi Qaldaıaqov kóshesiniń boıynda júrgizildi. Alleıaǵa qaraǵash pen sibir shyrshasynyń kóshetteri egildi.
Quryltaı Spıkeri «Taza Qazaqstan» bastamasy eldi abattandyrý men kógaldandyrýmen qatar, ár adamnyń qorshaǵan orta men qoǵamdyq keńistikke jaýapkershilikpen qaraý mádenıetin qalyptastyrýǵa baǵyttalǵanyn atap ótti.
– Búgin biz elorda turǵyndarymen birge alleıaǵa aǵash ektik. Birer jyl ótken soń bul aǵashtar Astananyń ajaryn ashyp, ortaq eńbegimizdi eske salyp turady. Igi iske óz úlesimizdi qosyp, qala men elge degen qamqorlyq árqaısymyzdan bastalatynyn kórsetý – biz úshin asa mańyzdy, – dedi Aıbek Dádebaı.
Bul Quryltaı depýtattarynyń zań shyǵarýshy organ qabyrǵasynan tys jerde ótkizgen alǵashqy birlesken ekologııalyq aktsııasy boldy.
Aǵash egýge depýtattar Eldos Baıalyshbaev pen Zahıra Begalıeva da qatysty. Olar qoǵamdyq keńistikter erekshe qajettiligi bar adamdar úshin de qoljetimdi bolýy kerektigine nazar aýdardy.
Eldos Baıalyshbaevtyń aıtýynsha, kedergisiz orta barlyq turǵynnyń ózin jaıly sezinip, ortaq iske teń dárejede qatysýyna múmkindik beretin qoljetimdi qoǵamdyq keńistikten bastalady.
Zahıra Begalıeva mundaı birlesken bastamalar qoǵamdaǵy aýyzbirshilikti nyǵaıtyp, ár adamnyń qala bolashaǵyna óz úlesin qosa alatynyn kórsetetinin atap ótti.
«Taza Qazaqstan» aıasynda eldi mekenderdi sanıtarlyq tazalaý, abattandyrý jáne kógaldandyrý jumystary júrgizilip keledi.
