Quryltaı depýtaty jastardyń memlekettik sheshimderge yqpal etý joldaryn túsindirdi
ASTANA. KAZINFORM — Jastar eldegi saıası reformalardy syrttaı baqylap qana qoımaı, zańnamalyq ózgeristerge qatysty óz usynystaryn bildirip, memlekettik sheshimder qabyldaý protsesine belsendi qatysýy kerek. Bul týraly Quryltaı depýtaty Aqerke Iskanderova Astanada ótken «Ulttyq damý kún tártibinde — jastar» atty sarapshylyq dıalog alańynda aıtty.
L. N. Gýmılev atyndaǵy Eýrazııa ulttyq ýnıversıtetinde ótken kezdesýde depýtat jastardyń memlekettik basqarý isine aralasýy, zań shyǵarý protsesine qatysýy jáne óz bastamalaryn júzege asyrý múmkindikterine toqtaldy. Onyń aıtýynsha, jastardy memlekettik basqarý júıesine tartýdaǵy basty maqsat — olardy belgili bir qyzmetke taǵaıyndaý emes, naqty sheshimder qabyldaýǵa yqpal etýine múmkindik berý.
Osy oraıda depýtat jastardyń zań jobalaryna qatysty usynystary men qoǵamdyq mańyzy bar bastamalaryn tikeleı halyq qalaýlylaryna joldaı alatynyn atap ótti.
— Eger de bir salada usynys-pikirlerińiz bolsa, qandaı da bir jobalaryńyz bolsa, bir zańǵa qatysty ózderińizdiń pikirlerińiz bolsa, ony bizge joldaı alasyz. Bul jerde de tsıfrlandyrýdy atap ótken jón. Óte jaqsy portal bar — e-Otinish. e-Otinish-te qandaı da bir ótinish jaýapsyz qalmaıdy. Mindetti túrde kimge joldadyńyzdar, sol adamǵa túsedi, sol ótinish qaralady jáne tıisti jaýabyn alasyz, — dedi ol.
Aqerke Iskanderova tsıfrlandyrýdyń óńirlerdegi jastarǵa da jańa múmkindikter ashyp otyrǵanyn atap ótti. Onyń sózinshe, búginde aýylda nemese aýdan ortalyǵynda turatyn jastardyń óz jobalaryn usynyp, memlekettik qoldaý tetikterin paıdalanýy úshin elordaǵa arnaıy kelýi mindetti emes.
— Máselen, túrli granttyq baǵdarlamalar men jastarǵa arnalǵan baıqaýlarǵa elektrondy formatta qatysýǵa bolady. Bul shalǵaı eldi mekenderdegi jastardyń da óz ıdeıalaryn júzege asyrýyna jol ashady, — dedi spıker.
Depýtat Prezıdent Joldaýyn tek memlekettik organdarǵa berilgen tapsyrmalar jıyntyǵy retinde qabyldamaý kerektigin de eske saldy. Onyń pikirinshe, qujatta kórsetilgen basymdyqtar ár azamatqa, sonyń ishinde jastarǵa óz salasyndaǵy múmkindikterdi baǵamdaýǵa baǵyt beredi.
Sonymen qatar ol jastardy eldegi saıası ózgeristerge sanaly túrde qatysýǵa, usynylǵan bastamalardy jan-jaqty zerdelep, ózindik pikir qalyptastyrýǵa shaqyrdy.
— Ol jerde endi bir popýlıstik, tek qana áleýmettik jelide sizderge usynylǵan aqparatty emes, ózderińiz naqty mátindik formatta nemese tolyq nusqasyn tyńdap, ári qaraı saralap, ózderińiz analız jasaýlaryńyz kerek. Sebebi bul jerde ózderińizdiń krıtıkalyq oıyńyz qosylý kerek, — dedi Aqerke Iskanderova.
Quryltaı depýtaty jastardyń el bolashaǵyna jaýapkershiligi búginnen bastalatynyn da jetkizdi.
— Buryn da aıtylatyn: «Jastar — eldiń bolashaǵy, sizderdiń ýaqyttaryńyz keledi» dep. Meniń aıtqym keletini, jastardyń ýaqyty — qazirgi sát. Bizdiń búgingi qadamdarymyzdan erteńimiz jasaqtalady, — dep túıindedi ol.
Aıta keteıik, Qazaqstandaǵy jastar sany 6 mıllıonǵa jýyqtady. Olardyń baspana alýyna, jumysqa ornalasýyna, kásip bastaýyna jáne jańa jobalaryn júzege asyrýyna baǵyttalǵan túrli memlekettik baǵdarlamalar jumys istep jatyr.
