Quryltaı depýtaty: jasóspirimder biliksiz blogerlerge eliktep barady
ASTANA. KAZINFORM — Quryltaı depýtaty Dıhan Qamzabekulynyń Mádenıet jáne aqparat mınıstri Arman Qyryqbaev pen Oqý-aǵartý mınıstri Juldyz Súleımenovanyń atyna joldaǵan saýalynda qoǵamda bilim-ǵylym kýltin qalyptastyrý máselesin kóterdi.
— Halyq qoldap-qýattaǵan jańa Konstıtýtsııamyzda mádenıet, bilim, ǵylym, ınnovatsııa qundylyǵy aıryqsha jazylǵany málim. Búginde ǵylym men ınnovatsııa — jańarý men el sapasynyń mańyzdy tetigi. Ata zańdaǵy qundylyq pen basymdyq endi ómirimizdiń mánine, ózegine aınalýǵa tıis. Ásirese, ǵylym men ınnovatsııanyń negizi mektepte júıeli oqytylyp, úzilissiz jalǵasýy shart. Ókinishke qaraı, búgingi jasóspirimder men jastardyń birshama bóligi qaıbir biliksiz bloger men kereǵar koýchke elikteıtini, tipti kóp ter tókpeı-aq mol qarjy tabýǵa senetini baıqalady. Bul — dana Abaı synaǵan «bes dushpan istiń» joly, — dedi Dıhan Qamzabekuly.
Osy oraıda ol dál qazir elimizge ınjenerlik-tehnologııalyq oı, izdenis, ónertabys aýadaı qajet ekenin atap ótti.
— Iá, rýhanı jetilý umytylmaıdy. Tereńirek qarasaq, Táýelsizdik muratynyń ózi — mádenı qazyna, adastyrmas temirqazyq. Búgin HH ǵasyrdyń bas shıregindegi ınjener Muhamedjan Tynyshbaıuly, medık-bıolog Halel Dosmuhameduly, matematık Ibadýlla Aqbergenuly, keńes kezeńindegi akademıkter — ınjener Qanysh Sátbaev, energetık Shapyq Shókın, molekýlıar-bıolog Murat Aıtqojın, qazaq qyzdarynan shyqqan alǵashqy akademıkter — geolog Patshaıym Tájibaeva, tuńǵysh tehnıka ǵylymdarynyń doktory, marksheıder Jamal Qańlybaeva, zamanymyzdyń birtýar akademıkteri — antropolog Orazaq Ysmaǵulov, matematık Muhtarbaı Ótelbaı, genetık Rahmetqajy Bersimbaı syndy júzdegen tulǵalardy oqýshyǵa da, stýdentke de úlgi ete bilý — boryshymyz. Gendik, medıtsınalyq ınjenerııa, STEM mamandyqtarynyń bastaýy óz dástúrimizde tur. Qoǵamǵa paıda ákeletin aqyl-oı men bilim-bilik qoryn «adam kapıtaly» deımiz. Bizde ol bolǵan jáne bola da beredi. Tek yjdaǵat pen júıeli is úzilmegeni jón, — dedi depýtat.
Osy oraıda ol birqatar usynysyn jarııalady. Bul rette ǵalym, ınjener, ónertapqysh sııaqty ıntellektýal tulǵalardyń qoǵamdyq bedelin, beınesin jas býynǵa uǵyndyratyn joba ázirleýdiń mańyzdylyǵy aıtyldy.
— Ǵylymǵa, tehnologııaǵa eleýli úles qosqan burynǵy-keıingi tulǵalardy aqparat quraldarynda, tsıfrlyq platformalarda úzbeı keń nasıhattaý jolǵa qoıylsa. Injenerlik-tehnıkalyq, jaratylystaný mamandyqtaryna talantty jastardy tartý men baýlýdyń tıimdi baǵdarlamalary jasalsa deımiz. Orta bilim júıesiniń, sonyń ishinde keleshek mektepteri men Oqýshylar saraılarynyń jumys nátıjesine (KRІ) ınjenerlik-tehnıkalyq, jaratylystaný mamandyqtaryna qatysty konstrýktorlyq alańdar men úıirmelerdiń tabysy jeke kórsetkish bolyp engeni mańyzdy, — dedi Dıhan Qamzabekuly.
Aıta keteıik, Memleket basshysy Qasym-Jomart Toqaev 16 jasqa tolmaǵandardyń áleýmettik jelide tirkelýine tyıym salý týraly zań jobasyn Quryltaıda qaraýdy usynyp, balalarǵa arnalǵan SIM-kartalardy engizýdi tapsyrdy.
