Quryltaı depýtaty sanatorııalyq-kýrorttyq uıymdarǵa qatysty ózgeris engizýdi usyndy
ASTANA. KAZINFORM — Búgin Quryltaıdyń jalpy otyrysynda depýtat Ekaterına Smolıakova Premer-mınıstrdiń birinshi orynbasary Nurlybek Nálibaevtyń atyna depýtattyq saýal joldap, Qazaqstannyń kýrorttyq áleýetin damytý máselesin kóterdi.
— Búginde Qazaqstanda ishki týrızm belsendi damyp keledi. Jańa baǵyttar ashylyp, joldar salynyp, týrıstik aımaqtar abattandyrylýda. Eń bastysy — qazaqstandyqtardyń óz elimizde saıahattaýǵa qyzyǵýshylyǵy artyp keledi. Biraq jańa týrıstik núktelerdi izdeı otyryp, burynnan bar úlken múmkindikti umytpaýymyz kerek. Ol — Qazaqstannyń sanatorıılik-kýrorttyq áleýeti. Densaýlyq saqtaý mınıstrliginiń baǵalaýynsha, elimizdiń sanatorıılerine jyl saıyn jarty mıllıonǵa jýyq adam keledi. Qolda bar derek boıynsha elimizde 257 sanatorııalyq-kýrorttyq uıym bar, olardyń 70%-y aýyldyq jerde ornalasqan. Bul — óńirlerdi damytý, jumys oryndaryn ashý, kásipkerlik pen ishki týrızmdi kúsheıtý úshin úlken resýrs. Alaıda Týrıstik salany damytýdyń 2023–2029 jyldarǵa arnalǵan tujyrymdamasynda nysandardyń tek 23%-ynyń jabdyqtalýy men servıs deńgeıi joǵary, al 41%-y qanaǵattanarlyqsyz dep baǵalanǵan, — dedi Ekaterına Smolıakova.
Sonymen qatar ol sanatorııler týraly biryńǵaı obektıvti statıstıka joq ekenin aıtty. Densaýlyq saqtaý mınıstrligi, Týrızm jáne sport mınıstrligi men Ulttyq statıstıka bıýrosynyń jikteýi sınhrondalmaǵan. Sondyqtan nysandardyń naqty sany, nomerlik qory, júktemesi, týrısterdiń bolý uzaqtyǵy, ishki jáne sheteldik kelýshiler boıynsha birtutas derek qajet.
— Mamyr aıynda jumys barysynda Abaı oblysyndaǵy Barlyq-Arasan degen sanatorııge bardym. Sonda osy áleýetti óz kózimmen kórdim. Temperatýrasy 42 gradýsqa jetetin radondy mıneraldy sý kózderi jerdiń betine shyǵyp jatyr. Kezinde bunda ǵaryshkerler de ońaltýdan ótken. Jetisýdaǵy Qapal-Arasan, Tekeliniń áıgili sanatorııleri, Moıyldy, Rahman qaınary jáne basqa da nysandar — Qazaqstannyń daıyn týrıstik kapıtaly.
Alaıda kóptegen sanatorıılerimizdiń búgingi jaǵdaıy, ókinishke qaraı, kóńil kónshitpeıdi: ınfraqurylymy tozǵan, materıaldyq bazasy eskirgen. Álemdik tájirıbede mundaı oryndar tutas týrıstik ortalyqtarǵa aınalǵan. ıÝNESKO Eýropanyń 7 elindegi 11 tarıhı kýrorttyq qalany Dúnıejúzilik mura tizimine engizgen, — dedi depýtat.
Elimizdegi sanatorııalyq-kýrorttyq uıymdardyń 93%-y jeke menshikte. Kóptegen nysannyń saqtalyp, jumys istep otyrǵany — kásipkerlerdiń eńbegi. Bul máseleniń sheshimi — olardy bıýdjet esebinen jóndeý emes, bızneske ınvestıtsııa salýǵa jaǵdaı jasaý.
— Osyǵan baılanysty Úkimetke bes naqty usynys engizemiz. Birinshiden, sanatorııalyq-kýrorttyq uıymdardyń biryńǵaı jiktemesin bekitip, úsh vedomstvonyń statıstıkasyn sınhrondaý jáne biryńǵaı tsıfrlyq tizilim qalyptastyrý. Ekinshiden, sanatorıılik emdeý men týrıstik qyzmettiń quqyqtyq arajigin naqtylap, sanatorııler men kásipodaqtardyń týrıstik ónimdi qalyptastyrý jáne ótkizý tártibin retteý. Úshinshiden, kýrorttyq aýmaqtardyń ınfraqurylymy úshin memlekettik organdar men ákimdikterdiń jaýapkershiligin naqty belgileý. Tórtinshiden, sanatorıılerdi jańǵyrtýǵa ınvestıtsııa salatyn kásipkerler úshin uzaq merzimdi qarjylandyrý jáne ınvestıtsııalyq yntalandyrý tetikterin qarastyrý, — dedi Ekaterına Smolıakova.
Eske salsaq, byltyr Májilis Ystyqkóldegi Qazaqstan menshigindegi 4 sanatorııge qatysty qujatty qabyldady.
