Quryltaı depýtaty: lıtsenzııasyz ınvestıtsııalyq jobalar jappaı jarnamalanyp jatyr
ASTANA. KAZINFORM — Quryltaı depýtaty ıÝrıı Lı Qazaqstannyń qarjy naryǵynda qyzmet kórsetýge lıtsenzııasy joq sheteldik ınvestıtsııalyq jobalardy nasıhattaıtyn materıaldardyń qazaqstandyq ınternet-resýrstarda júıeli túrde jarııalanyp jatqanyn málimdedi.
— Qazaqstanda tıisti lıtsenzııalary bolmasa da, azamattarǵa ınvestıtsııalyq múmkindikter usynatyn jáne broker retinde áreket etetin sheteldik ınternet-jobalardyń jarnamasyn otandyq buqaralyq aqparat quraldarynyń resýrstarynda ornalastyrý tájirıbesi júıeli sıpat aldy. Mundaı materıaldar tek áleýmettik jelilerde ǵana emes, sonymen qatar óńirlik jáne salalyq basylymdardyń saıttarynda da jarııalanady, — dedi ıÝrıı Lı.
«Aq jol» partııasynyń 2023–2026 jyldar aralyǵyn qamtıtyn monıtorıngi Qazaqstannyń 51 ınternet-resýrsynda 48 jobaǵa qatysty 168 jarııalanymdy anyqtady.
Depýtat bul materıaldarda lıtsenzııanyń bar-joǵy, onyń nómiri jáne ony bergen organ týraly aqparattyń joq ekenin atap ótti.
Sonymen qatar ol qarjy retteýshisi men quqyq qorǵaý organdarynyń nazaryna ilikken belgili bir uıym bar ekenin, alaıda osy uıymdy nasıhattaıtyn materıaldar qazaqstandyq ınternet-resýrstarda áli de taralyp jatqanyn sóz etti.
Osy oraıda depýtat parlamenttik saýalda baıandalǵan barlyq derekti jan-jaqty qarastyrýdy, sondaı-aq mundaı jarnamany jedel anyqtaý jáne jolyn kesý maqsatynda salalyq vedomstvolar men quqyq qorǵaý organdary arasynda turaqty is-qımyl ornatýdy surady.
Aıta keteıik, búgin Quryltaıda QR Іshki ister mınıstriniń orynbasary Sanjar Ádilov Qazaqstanda kıberqylmysqa kúres boıynsha túsinik berdi.
