Quryltaı depýtaty klınıng salasyndaǵy jumyspen qamtýdy zańdastyrý tetikterin usyndy
ASTANA. KAZINFORM – Búgin Quryltaıdyń jalpy otyrysynda depýtat Nuraınash Kamalova Eńbek, Oqý-aǵartý, Ónerkásip, Mádenıet jáne aqparat mınıstrlikterine saýal joldap, Qazaqstandaǵy klınıng salasyndaǵy jumyspen qamtýdy zańdastyrýǵa qatysty máseleni kóterdi.
- Kóterilip otyrǵan másele vedomstvolardyń birlesip keshendi túrde sheshim qabyldaýyn qajet etetindikten, depýtattyq saýalymyz tórt mınıstrlikke birdeı joldandy. Salalyq qaýymdastyqtar men sarapshylardyń paıymdaýynsha, Qazaqstanda klınıng qyzmetteri salasyna shamamen 1,5 mln-nan astam adam jumys isteıdi. Bul kórsetkish salanyń asa aýqymdy ekenin jáne Qazaqstan Respýblıkasynyń eńbek naryǵynda eleýli rólge ıe ekenin kórsetedi. Klınıng salasy elimizdegi sanıtarııalyq jaǵdaıdy qamtamasyz etip, kez kelgen qoǵamdyq oryndardy tıisti deńgeıde kútip ustaýǵa múmkindik beredi. Osy rette sala qyzmetkerlerin túgendep, olardy esepke alyp, resmı jumyspen qamtý deńgeıin, salanyń kásibı qurylymyn, eńbekaqy deńgeıin men kásibı oqytýǵa degen qajettilikti tolyq baǵalaıtyn tetik múlde joq jáne atalǵan mamandyq ıeleriniń qoǵamdaǵy mártebesi de tómen. Elimizde osy kúnge deıin eden jýýshylardyń, aýla sypyrýshylardyń jáne klınıng salasyndaǵy qyzmetkerlerdiń eńbegi kóbine biliktiligi tómen ári bedelsiz jumys retinde qabyldanady, - dedi N. Kamalova.
Osy oraıda mundaı kózqaras sala qyzmetkerleriniń mártebesiz adam retinde baǵalap, tazalyq mádenıetiniń qalyptasýyna keri áser etetinin aıtty.
- Qazirgi zamanǵy klınıng – jaı ǵana qosalqy qyzmet emes, arnaıy bilim men daǵdylardy talap etetin derbes kásibı sala. Taǵy bir eleýli másele – sala qyzmetkerleriniń resmı tabysynyń tómen bolýy sebepti qosymsha tabys tabýy resmı eńbek qatynastary aıasynda júzege asyrylmaıtyny. Nátıjesinde, azamattar arasynda beıresmı jumys isteý beleń alyp, áleýmettik ári zeınetaqy kepildikteriniń, eńbek quqyqtarynyń jáne ózge de áleýmettik qorǵaý tetikteriniń saqtalmaýyna ákelýi ábden múmkin, - dedi depýtat.
Osy oraıda Nuraınash Kamalova tıisti mınıstrlikterge kelesi sharalardy qabyldaýdy usyndy:
1) klınıng salasyndaǵy jumyspen qamtýǵa keshendi taldaý júrgizip, qyzmetkerlerdiń naqty sany týraly resmı statıstıkalyq derekterdi qalyptastyrý;
2) klınıng salasynda kásibı biliktilikti qalyptastyrý jáne damytý máselesin qolǵa alý. Onyń ishinde tehnıkalyq jáne kásiptik bilim berý júıesinde tıisti mamandardy kásibı oqytý jáne daıarlaý múmkindigin qarastyrý;
3) saladaǵy beıresmı jumyspen qamtýdy qysqartýǵa baǵyttalǵan keshendi sharalardy ázirlep, jumysshynyń kásibı mártebesin arttyryp, biliktilik júıesin damytyp, resmı tabysynyń ósýine jaǵdaı jasaý.
- Klınıng salasyndaǵy mamandyqtardy tıisti biliktilik talaptary men kásiptik oqytý múmkindikteri bar tolyqqandy jumysshy mamandyqtar retinde taný máselesin qarastyrý mańyzdy. Sala qyzmetkerlerin qarjylyq saýattylyq jáne áleýmettik qoldaýmen qamtý kerek. Sonymen qatar klınıng salasy qyzmetkerleriniń qoǵamdyq mártebesin arttyrýǵa jáne olardyń eńbegine qurmetpen qaraýdy qalyptastyrýǵa baǵyttalǵan keshendi jumystar júrgizý múmkindigin qarastyrý qajet, - dedi depýtat.
Buǵan deıin Qazaqstanda merekeden keıingi klınıng qyzmetiniń quny qansha ekenin jazǵan edik.
