Quryltaı depýtaty bergen qaryzyn 23 eselep qaıtarýdy talap etken kredıtorlardy jazalaýdy usyndy
ASTANA. KAZINFORM — Qaryz alýshylardyń bıometrııalyq derekterin jınap, alǵan qaryzynan ondaǵan ese kóp qarajatty qaıtarýdy talap etetin zańsyz kredıtorlardy jaýapkershilikke tartý kerek.
Mundaı usynysty Bas prokýrorǵa, Іshki ister mınıstrine jáne Qarjylyq monıtorıng agenttiginiń tóraǵasyna saýal joldaǵan Quryltaı depýtaty ıÝrıı Lı jasady.
Máselen, depýtattyń dereginshe, Alem Credit onlaın-platformasynyń mıkrokredıttik qyzmetpen aınalysýǵa tirkeýi de, lıtsenzııasy da joq. Soǵan qaramastan, ondaǵan ınternet-resýrs arqyly qaryz berýdi jalǵastyryp keledi. Mundaı kompanııalar zańdy qarjy uıymdary nesıe berýden bas tartqan azamattarǵa qaryz usynýy múmkin.
— Bul rette syıaqynyń jyldyq tıimdi mólsherlemesi resmı belgilengen shekten 9,5 ese, al aıyppul sanktsııalarynyń mólsheri 10 ese asyp otyr. Qaryz óteý merzimi ótken jaǵdaıda psıhologııalyq qysym men qorqytý belgileri bar óndirip alý ádisteri qoldanylady, — dedi depýtat Quryltaıdyń jalpy otyrysynda.
Onyń aıtýynsha, qaryzyn ýaqytynda óteı almaǵan azamattar psıhologııalyq qysym men qorqytýǵa tap bolady. Azamattar úzdiksiz qońyraýlar shalynatynyn, týystary men jumys berýshileri arqyly qysym jasalatynyn aıtyp otyr. Sondaı-aq olardy jeke málimetteri men jasandy ıntellekt kómegimen jasalǵan ádepsiz sıpattaǵy fotosýretterin taratamyz dep qorqytady.
— Buǵan deıin qaryz alǵan azamattarǵa alǵan somasynan birneshe ese kóp qarajatty qaıtarý týraly talaptar áli de qoıylyp keledi. Máselen, 50 000 teńge kólemindegi qaryz maquldanǵan jaǵdaıda, adamnyń qolyna is júzinde 32 000 teńge ǵana túsedi. Al qaıtarýdy talap etetin soma 752 000 teńgeni quraıdy. Bul naqty alynǵan somadan shamamen 23 ese kóp, — dedi depýtat.
Buǵan deıin Premer-mınıstrge saýal joldaǵan depýtat Ashat Rahymjanov sapasyz benzınnen zardap shekken azamattardy qorǵaý tetigin qalyptastyrý kerektigin aıtqan edi.
