Quryltaı depýtaty azamattarǵa túsiný qıyn zań normalaryn anyqtaýdy usyndy
ASTANA. KAZINFORM – Zań normalaryn quqyqtyq túsindirý jumysyn úılestiretin biryńǵaı memlekettik organdy aıqyndaý kerek. Búgin Quryltaı otyrysynda Ádilet mınıstrine saýal joldaǵan depýtat Berik Berkimbaev osyndaı bastama kóterdi.
- Memleket basshysy Qasym-Jomart Toqaev Qazaqstan Halyq Keńesiniń alǵashqy otyrysynda Qazaqstan Respýblıkasy Konstıtýtsııasynyń erejelerin azamattarǵa keńinen túsindirýge jáne onyń mańyzyn nasıhattaýǵa erekshe nazar aýdardy. «Ádilet» partııasy Memleket basshysynyń bul tapsyrmasy barlyq quzyrly memlekettik organdar jumysynyń mańyzdy baǵyty bolýy tıis dep esepteıdi. Búginde azamattardyń quqyqtary men mindetterine qatysty kóptegen normatıvtik quqyqtyq aktiler qabyldanyp jatyr. Alaıda, zań normalaryn halyqqa jetkizýmen ǵana shektelmeı, olardyń mazmunyn qarapaıym ári túsinikti tilmen túsindirip, is júzinde qoldaný tártibin kórsetý mańyzdy, - dedi ol.
Depýtattyń atap ótýinshe, zańnamaǵa sáıkes memlekettik organdar óz quzyreti sheginde normatıvtik-quqyqtyq aktilerge túsindirme beredi. Alaıda bul jumysty jalpy úılestirip, biryńǵaı tásil qalyptastyratyn memlekettik organ naqty aıqyndalmaǵan. Sonyń saldarynan quqyqtyq túsindirý jumysy ártúrli nysandar men tásilder arqyly júrgiziledi.
- Sondyqtan biryńǵaı úılestirýshi organdy aıqyndap, ortalyq jáne jergilikti memlekettik organdarǵa ortaq ádisteme ázirleý oryndy dep sanaımyz. Sonymen qatar quqyqtyq túsindirý jumysynyń tıimdiligi ótkizilgen kezdesýlerdiń, jarııalanymdar men is-sharalardyń sanymen ǵana ólshenbeýi kerek. Negizgi kórsetkish – azamattardyń zań normalaryn qanshalyqty túsinetini, óz quqyqtary men mindetterin bilýi jáne qajetti quqyqtyq aqparatty qoljetimdi túrde ala alýy. Alaıda búginde azamattardyń quqyqtyq aqparattaný deńgeıin, aqparattyń qoljetimdiligin jáne berilgen túsindirmelerdiń sapasyna qanaǵattanýyn turaqty baǵalaıtyn biryńǵaı tetik joq, - dedi Berik Berkimbaev.
Quryltaı depýtatynyń paıymynsha, bul máseleni ortaq ádisteme boıynsha turaqty áleýmettik zertteýler júrgizý arqyly sheshýge bolady. Onyń nátıjeleri túsinýge qıyn zań normalaryn anyqtap, quqyqtyq túsindirý jumysyndaǵy problemalardy naqtylaýǵa jáne tıisti sharalar qabyldaýǵa múmkindik beredi.
Osyǵan baılanysty ol:
- quqyqtyq túsindirý jumysyn úılestiretin biryńǵaı memlekettik organdy aıqyndap, memlekettik organdar úshin ortaq ádisteme ázirleý máselesin qarastyrýdy;
- azamattardyń quqyqtyq aqparattaný deńgeıin, quqyqtyq aqparattyń qoljetimdiligin jáne túsindirý sapasyna qanaǵattanýyn baǵalaıtyn turaqty ári obektıvti áleýmettik zertteýler júrgizý tetigin engizýdi;
- zertteý nátıjeleri negizinde azamattarǵa túsiný qıyn zań normalaryn anyqtap, olardy túsindirý sapasyn arttyrý jóninde naqty sharalar qabyldaýdy surady.
Buǵan deıin depýtat Nurlan Dýlatbekov ýnıversıtetterdiń korporatıvtik basqarý tetikterin kúsheıtip, olardyń jaýapkershiligin arttyrý qajettigin aıtqan edi.
