Quryltaı depýtaty Alataý qalasy turǵyndarynyń basty problemalaryn atady
ASTANA. KAZINFORM – Quryltaı otyrysynda Premer-mınıstrdiń orynbasaryna saýal joldaǵan depýtat Janarbek Áshimjan Alataý qalasynyń negizgi problemalaryn kóterdi.
- Alataý – kezekti jańa qala ǵana emes, ol elimizdiń tehnologııalyq jáne ekonomıkalyq jańǵyrýynyń mańyzdy alǵysharttarynyń biri. Sondyqtan Smart City eń aldymen smart ómir súrý ortasyn qalyptastyrýy tıis. «Ádilet» partııasynyń respýblıkalyq saılaýaldy shtabynyń múshelerimen kezdesýde qala turǵyndary ózderiniń alańdaýshylyǵyn jetkizgenin basa aıtqymyz keledi. Qala quramyna engen eldi mekenderdiń halqy bazalyq ınfraqurylym máselesimen áli betpe-bet kelip tur. Tsıfrlyq transformatsııanyń tolyq nátıjesi týraly aıtý da qıyndaý. Sondyqtan Alataýdyń damýyn jańa tehnologııalyq nysandarmen ǵana emes, halyqtyń kúndelikti ómirindegi naqty ózgeristermen ushtastyrý mańyzdy, - dedi Quryltaı depýtaty.
Onyń málimetinshe, Eńbek jáne Jetigen eldi mekeninde sońǵy jyldary birqatar másele sheshildi. «Keleshek mektep» salyndy, zamanaýı feldsherlik-akýsherlik pýnkt iske qosyldy, gaz jelileri tartyldy. Joldar men elektr jelilerin jańartý jumystary bastaldy.
Jetigendegi temirjol ótkeliniń máselesi jańa kópirdiń iske qosylýymen sheshimin tapty.
- Alaıda áli de problemalar bar. Keı kóshelerde abattandyrý aıaqtalmaǵan. Gaz jelisine qosylý quny turǵyndar úshin qymbat. Áleýmettik nysandarǵa bilikti mamandar tartý máselesi de ózekti. Bul – jeke aýyldardyń ǵana emes, Alataý qalasynyń jańa modeliniń qanshalyqty ádiletti ári tıimdi qalyptasyp jatqanyn aıqyndaıtyn kórsetkish. Tsıfrlyq memleket qurý – tek qosymsha kamera nemese elektrondy qyzmet engizý emes. Onyń máni – azamattyń ýaqytyn únemdeý, memlekettik qyzmetti qoljetimdi etý, ınfraqurylymdy tıimdi basqarý jáne sheshim qabyldaýdy naqty derekterge negizdeý, jalpy halyqtyń ómir súrýine qolaıly orta jasaqtaý. Sondyqtan Alataý Smart City jobasy qala ortalyǵyndaǵy tehnologııalyq sheshimdermen ǵana shektelmeı, onyń elektrondyq-áleýmettik múmkindigi qala quramyna kiretin barlyq eldi mekenderge jetýi qajet, - dedi Janarbek Áshimjan.
Osyǵan oraı ol vıtse-premer Qanat Bozymbaevtan:
- Alataý qalasynyń barlyq eldi mekenin qamtıtyn ınjenerlik, áleýmettik jáne tsıfrlyq ınfraqurylymdy damytýdyń biryńǵaı josparyn bekitýdi;
- mektepter men medıtsınalyq nysandardy qajetti mamandarmen qamtamasyz etýdi jáne tsıfrlyq memlekettik qyzmetterdi barlyq eldi mekenge kezeń-kezeńimen engizýdi;
- Alataý qalasynyń tıimdiligin ınvestıtsııa kólemimen ǵana emes, turǵyndardyń ómir sapasy, ınfraqurylymǵa qoljetimdiligi jáne memlekettik qyzmetterdiń sapasy arqyly baǵalaıtyn naqty kórsetkishter júıesin engizýdi surady.
Buǵan deıin depýtat Rábıǵa Toqseıitova Qus sharýashylyǵynyń ulttyq ǵylymı-zertteý ortalyǵyn qurýdy usynǵan edi.
