Quryltaı bılik júıesinde irgeli ózgeristerge jol ashady — Prezıdent
ASTANA. KAZINFORM — Quryltaı jumysynyń bastalýy memlekettik basqarý júıesindegi irgeli ınstıtýtsıonaldyq ózgeristerge jol ashady. Bul pikirdi Memleket basshysy Qasym-Jomart Toqaev aıtty.
Prezıdenttiń aıtýynsha, Quryltaı bılik júıesin qalyptastyrý isinde mańyzdy ról atqarady.
— Atap aıtqanda, Konstıtýtsııalyq sot sýdıalary, Ortalyq saılaý komıssııasynyń, Joǵary aýdıtorlyq palatanyń músheleri Quryltaıdyń kelisimimen taǵaıyndalady. Depýtattar Prezıdenttiń usynýy boıynsha Joǵarǵy sot sýdıalaryn saılaıdy jáne qyzmetinen bosata alady. Quryltaıǵa Konstıtýtsııalyq sot pen Joǵarǵy sot sýdıalaryn, sondaı-aq, depýtattardy quqyqtyq ımmýnıtetten aıyrý quzyreti berilgen, — dep atap ótti Qasym-Jomart Toqaev Bul týraly birinshi shaqyrylymdaǵy Quryltaıdyń birinshi sessııasynda.
Quryltaı Úkimet pen Joǵary aýdıtorlyq palatanyń respýblıkalyq bıýdjet týraly esepterin bekitedi, Konstıtýtsııalyq sottyń jyl saıynǵy joldaýyn tyńdaıdy.
Budan bólek, depýtattar Úkimetke senimsizdik bildirýge, Prezıdentke Úkimettiń jekelegen múshelerin qyzmetten bosatý týraly usynys bildirýge quqyly.
— Bir sózben, Quryltaıǵa atqarýshy jáne sot bıligin qalyptastyrýǵa, el taǵdyryn aıqyndaıtyn strategııalyq mańyzy bar máselerdi sheshýge qatysty asa aýqymdy quzyret berildi. Biz, osylaısha, zań shyǵarýshy organnyń yqpalyn edáýir kúsheıttik. Bul — bılik tarmaqtary arasyndaǵy ózara teńgerim júıesi nyǵaıa túsedi degen sóz, — dedi Memleket basshysy.
Jalpy, memlekettik jáne qoǵamdyq ınstıtýttardy júıeli túrde jańǵyrtý jumysy jyl sońyna deıin jalǵasatyn bolady.
Eske sala ketsek, Astanada Prezıdenttiń qatysýymen birinshi shaqyrylymdaǵy Quryltaıdyń birinshi sessııasy ashyldy.
Buǵan deıin Q. Toqaev Quryltaıdyń alǵashqy quramyna aıryqsha jaýapkershilik júkteletinin aıtqan edi.
Sheteldik ınvestorlar quıǵan qomaqty qarjy nátıjesinde elimizdiń barlyq óńirinde jańa óndiris nysandary men jumys oryndary ashylyp jatyr.
