Quryltaı bılik júıesin túbegeıli jańǵyrtady
ASTANA. KAZINFORM – Quryltaıdyń birinshi shaqyrylymynyń depýtaty bolý – eń aldymen, erekshe sát. Bul týraly birinshi shaqyrylymdaǵy Quryltaıdyń birinshi sessııasyn ashqan Memleket basshysy Qasym-Jomart Toqaev aıtty.
- Barshańyzǵa birinshi shaqyrylymdaǵy Quryltaıdyń birinshi sessııasynyń ashylýy qutty bolsyn! Búgin elimiz óziniń damý jolynda asa mańyzdy kezeńge aıaq basty. Bul – memleketimiz úshin mán-maǵynasy aıryqsha oqıǵa, tarıhı sát. Biz ult jylnamasynyń jańa paraǵyn ashyp otyrmyz. Búgin jalpyulttyq referendým kezinde Qazaqstan halqy qoldaǵan jańa Konstıtýtsııaǵa sáıkes elimizdiń bir palataly zań shyǵarýshy organy – Quryltaı resmı túrde óz jumysyna kirisedi. Bul – memleketimizdiń saıası júıesiniń jańarý úderisi dál osy kúnnen bastaý alady degen sóz, - dedi Prezıdent.
Memleket basshysy tól tarıhymyzda Quryltaıda memlekettik mańyzy bar máseleler keńinen talqylanyp, ortaq sheshimder qabyldanǵanyn atap ótti.
- Bul ınstıtýttyń jańa kezeńde de jóni bólek bolary anyq. Sebebi Quryltaı bılik júıesin túbegeıli jańǵyrtady, búkil memlekettik apparattyń jumysyna tyń serpin beredi. Quryltaı ulttyq zańnama sapasyn arttyrý arqyly elimizdiń quqyqtyq negizin nyǵaıta túsedi. Osy tarıhı mıssııany atqarý sizderge júktelip otyr. Quryltaıdyń birinshi shaqyrylymynyń depýtaty bolý – eń aldymen, erekshe sát. Bul – úlken baqyt dep aıtsaq, qate bolmas. Osy asa abyroıly atqa saı laıyqty qyzmet etesizder dep senemin! - dedi Qasym-Jomart Toqaev.
Búgin Astanada Memleket basshysy Qasym-Jomart Toqaevtyń qatysýymen birinshi shaqyrylymdaǵy QR Quryltaıynyń birinshi sessııasy ashylǵanyn jazǵan edik.
