Quryltaı barlyq memlekettik ınstıtýttyń legıtımdiliginiń bastaýy bolady – saıasattanýshy
ASTANA. KAZINFORM – Saıasattanýshy Baqytjan Buqarbaı «Quryltaı saılaýy: konstıtýtsııalyq negizder jáne saıası transformatsııa» degen ataýmen uıymdastyrylǵan sarapshylar alańynda aldaǵy saılaýǵa jáne Quryltaıdyń róli qandaı bolatynyna baǵa berdi.
— Saılaý naýqany ǵana emes, Qazaqstanda jańa júıeniń saıası qalyptasýy júrip jatyr. Konstıtýtsııalyq reforma zań qabyldanǵan kezde aıaqtalmaıdy. Ol jańa ınstıtýttar jumys isteı bastaǵanda, ary qaraıǵy ómirsheńdigin dáleldeıdi. Sondyqtan Quryltaı saılaýy — konstıtýtsııalyq reformanyń qorytyndysy emes, kerisinshe, onyń praktıkalyq kezeńiniń bastaýy, — dedi ol.
Sarapshynyń sózinshe, reformanyń eń mańyzdy erekshiligi — jekelegen memlekettik organdar emes, qazir elimizdegi jarııa bıliktiń tutas arhıtektýrasy ózgerip jatyr.
— Saıasattaný ǵylymynda eń alǵashqy qurylǵan ınstıtýt ary qaraı qurylatyn ınstıtýttardyń legıtımdilgi men turaqtylyǵyna áser etedi. Sonymen birge, keıingi qurylǵan ınstıtýttar alǵashqy qurylǵan ınstıtýttyń tıimdiligine qaraı boı túzeıdi. Bul óte mańyzdy. Konstıtýtsııalyq reformadan keıin eń alǵashqy qurylatyn ınstıtýt Quryltaı bolǵaly otyr. Sondyqtan onyń qalyptasqaly jatqan saıası arhıtektýranyń syzbasynda mańyzy zor. Quryltaı saılaýy ótkennen keıin, Vıtse-prezıdent, Úkimet, Halyq keńesi sekildi ınstıtýttar iske kirisedi. Demek, Quryltaı barlyq memlekettik ınstıtýttyń legıtımdiliginiń bastaýy bolady, — dedi ol.
Aıta keteıik, buǵan deıin QR Parlamenti Májilisi VIII shaqyrylymynyń depýtaty Aıdos Sarym Quryltaı saılaýy úlken bastamalarǵa jol ashatynyn aıtqan edi.
