Quryltaı: Aýdan ákimdikteriniń qarjylyq derbestigin keńeıtý usynyldy

ASTANA. KAZINFORM — Májilis depýtaty, qoǵam qaıratkeri Nurtaı Sabılıanov Qyzylordada ótip jatqan V Ulttyq quryltaıda aýdan ákimdikteriniń mektep jóndeýge qarajat bóle almaıtynyn, bul quziretti oblystyq bıýdjetten keri qaıtarý keregin usyndy.

N.Sabılıanov Memleket basshysynyń aýyl ákimderiniń quzyretin keńeıtý jóninde naqty tapsyrmalar bergenin eske saldy.

— Bul baǵytta óńirlerge sapar barysynda aýyl ákimderiniń qarjylyq derbestigin keńeıtý, jergilikti salyqtar men shyǵystardy basqarý quzyretin naqtylaýdy jan-jaqty talqyladyq. Osyǵan oraı, bilimdi qarjylandyrýdy oblystyq bıýdjetten aýdandyq bıýdjetke qaıta berýdi usynamyn. Mysaly shalǵaı aýyldaǵy bir mekteptiń jylý júıesi isten shyqsa, máseleni shuǵyl sheshý qıyn. Oǵan aýdan ákimi bıýdjetten qarajat bere almaıdy. Ol úshin oblystyq bıýdjetti naqtylaý kerek, — dedi N. Sabılıanov Prezıdent qatysýymen ótip jatqan V Ulttyq quryltaıda.

ıAǵnı qazir 176 aýdandyq ákimdik sol aýdandaǵy mektepterdi jóndeýge, jańa ǵımarattar men sportzaldardy salýǵa qarajat bóle almaıdy. Sondyqtan aýdandarda bilim salasyn qarjylandyrý aýdandyq bıýdjette bolǵany durys, deıdi depýtat.

Sonymen birge, spıker aýyldyq jerlerde medıtsına mamandary tapshylyǵy máselesin de kóterdi. Memleket tarapynan aýylǵa barǵan jas dárigerlerge kóterme járdemaqy — 8,5 mln teńge. Alaıda taldaý nátıjesi bul tetik barlyq óńirde birdeı jáne tolyq kólemde oryndalmaı otyrǵanyn kórsetken.

— Osyǵan baılanysty atalǵan qoldaý sharalaryn “Dıplommen aýylǵa” baǵdarlamasymen tikeleı úılestirip, áleýetin kúsheıtýdiń mańyzy zor. Baǵdarldama aıasynda dárigerlerdi aýylmen qatar shaǵyn, monoqalalarǵa tartý úshin naqty tetikter engizýdi usynamyn. Ol úshin áleýmettik qoldaý, turǵyn úı jáne basqa da múmkindikterdi bir júıege keltirgen jón, — dep usynys bildirdi depýtat.

Aıta keteıik, Qyzylordada Memleket basshysy Qasym-Jomart Toqaevtyń qatysýymen Ulttyq quryltaıdyń besinshi otyrysy bastaldy. Quryltaıdaǵy talqylaýǵa tanymal memleket jáne qoǵam qaıratkerleri, saıası partııalardyń, úkimettik emes sektordyń, bıznes-qaýymdastyqtardyń,saraptamalyq qaýymdastyqtyń jáne oblystardyń qoǵamdyq keńesteriniń ókilderi keldi.

Buǵan deıin N. Sabılıanov Ulttyq quryltaı jańadan qurylǵan oblystardyń damýyna aıryqsha serpin bergenin, el tarıhynda alǵash ret shekaralyq aýmaqtardy damytýǵa arnalǵan zań ázirlengenin aıtqan edi.