Quryltaı aldaǵy 5 jyldaǵy jumysyn qalaı úılestiretini belgili bolady
ASTANA. KAZINFORM – Búgin Quryltaı otyrysy ótedi. Onda depýtattar Quryltaıdyń aldaǵy 5 jylda Úkimetpen jáne Qazaqstan Halyq Keńesimen jumysyn retteıtin mańyzdy qujatty qabyldamaq.
Aıta keterligi, 7 qyrkúıekte Quryltaı spıkeri Aıbek Dádebaıdyń tóraǵalyǵymen ótken Bıýro otyrysynda Quryltaı reglamentiniń jobasy talqylanǵan bolatyn. Endi osy qujat búgingi otyrystyń kún tártibine shyǵarylyp otyr. Reglament jobasy Qazaqstan Respýblıkasynyń jańa Konstıtýtsııasy men «Qazaqstan Respýblıkasynyń Quryltaıy jáne onyń depýtattarynyń mártebesi týraly» Konstıtýtsııalyq zańnyń normalaryna sáıkes ázirlengen.
Qujat Quryltaı depýtattarynyń qyzmetin naqty quqyqtyq retteýdi qamtamasyz etedi. Onda parlamentarızm salasynda jınaqtalǵan tájirıbe, Quryltaıdyń bir palataly modeliniń erekshelikteri, sondaı-aq onyń konstıtýtsııalyq ókilettikteriniń jańa júıesi eskerilgen.
Sonymen qatar Quryltaıdyń turaqty komıtetteriniń jumysyn uıymdastyrý, zań jobalaryn qaraýdyń biryńǵaı úsh kezeńdi modeli men saralanǵan merzimderi, sondaı-aq Quryltaıdyń Úkimetpen jáne Qazaqstan Halyq Keńesimen keshendi ózara is-qımylyn retteý máseleleri qamtylǵan.
Buǵan deıin Quryltaı buqaralyq aqparat quraldary ókilderin akkredıtteý qaǵıdalaryn bekitken bolatyn. Atalǵan qujatqa sáıkes, Quryltaıdyń, turaqty komıtetterdiń, depýtattyq toptardyń, Quryltaı depýtattarynyń qyzmetin jarııalaý maqsatymen Quryltaı ǵımarattarynda turaqty jumys isteıtin jýrnalıster (BAQ ókilderi) úshin, sondaı-aq BAQ redaktsııasynyń Quryltaı qyzmetin jarııalaý boıynsha jekelegen tapsyrmalaryn oryndaıtyn BAQ ókilderi úshin turaqty túrde akkredıtteý jáne ýaqytsha akkredıtteý júzege asyrylady. Akkredıttelgen jýrnalıst (BAQ ókili) mynadaı jaǵdaılarda akkredıtteýden aıyrylady:
- buqaralyq aqparat quraly bas redaktorynyń jáne (nemese) buqaralyq aqparat quraly menshik ıesiniń jýrnalısti (BAQ ókilin) turaqty akkredıtteýden aıyrý týraly ótinishi;
- jýrnalıst (BAQ ókili) taratqan, akkredıtteýshi uıymnyń iskerlik bedeline nuqsan keltiretin málimetterdi shyndyqqa saı kelmeıdi dep taný týraly zańdy kúshine engen sot sheshiminiń bolýy;
- buqaralyq aqparat quralynyń ónimin taratýdy ne buqaralyq aqparat quralynyń shyǵarylymyn toqtata turý ne toqtatý týraly zańdy kúshine engen sot sheshiminiń bolýy;
- buqaralyq aqparat quraldarynyń qatysýymen ótkiziletin Qazaqstan Respýblıkasynyń Quryltaıy is-sharalarynyń bekitilgen Qaǵıdalaryn, Reglamentin, jýrnalısterdiń (BAQ ókilderiniń) kásibı jáne ádeptik minez-qulyq normalaryn, Quryltaı ǵımarattaryndaǵy ótkizý rejımi men obektishilik rejımniń talaptaryn, sondaı-aq Quryltaıda belgilengen eńbek tártibi erejelerin eki jáne odan kóp ret buzýy.
Jýrnalısterdi (BAQ ókilderin) turaqty akkredıtteýden aıyrý alty aı merzimge júzege asyrylady.
Esterińizge sala ketsek, munyń aldynda ótken Quryltaıdyń alǵashqy otyrysynda jańadan saılanǵan depýtattar ant berip, zań shyǵarýshy organ tóraǵasynyń 3 orynbasary saılandy.
Sonymen qatar Quryltaıdyń turaqty komıtetteriniń tóraǵalary men olardyń músheleri belgili boldy. Naqtyraq aıtqanda, «Qazaqstan Respýblıkasynyń Quryltaıy jáne onyń depýtattarynyń mártebesi týraly» Konstıtýtsııalyq zańynyń 11-babyna sáıkes Quryltaı tóraǵasy Aıbek Dádebaı óziniń orynbasarlary laýazymyna Nurlan Beknazarovtyń, Danııa Espaevanyń jáne Dınara Zákıevanyń kandıdatýralaryn usynyp, olar depýtattar tarabynan qoldaý tapty.
Quryltaıda qurylǵan segiz turaqty komıtetke, ıaǵnı Agrarlyq máseleler, ekologııa jáne tabıǵı resýrstar komıtetine Serik Egizbaev; Konstıtýtsııalyq zańnama, sot júıesi jáne quqyq qorǵaý organdary komıtetine Únzıla Shapaq; Halyqaralyq ister, qorǵanys jáne qaýipsizdik komıtetine Marat Qojaev; Óńirlik jáne ınfraqurylymdyq damý komıtetine Ámirbek Ospanbekov; Áleýmettik-mádenı damý komıtetine Ashat Aımaǵambetov; Qarjy jáne bıýdjet komıtetine Olga Perepechına; Tsıfrlandyrý, ınnovatsııalar jáne ǵylym komıtetine Darhan Ahmedıev; Ekonomıkalyq saıasat, ónerkásip jáne energetıka komıtetine Natalıa Godýnova tóraǵa bolyp saılandy.
Bul rette Quryltaıdyń bir turaqty komıtetiniń tóraǵasy Quryltaı oppozıtsııasynan saılanýy tıis edi. Osyǵan oraı Quryltaıdaǵy kópshilik jáne oppozıtsııaǵa kiretin saıası partııalar fraktsııalary basshylarynyń konsýltatsııalary ótti. Konsýltatsııa barysynda birlesken sheshimge sáıkes, Quryltaıdyń Agrarlyq máseleler, ekologııa jáne tabıǵı resýrstar komıtetiniń tóraǵasy oppozıtsııadan usynylyp, qalǵan komıtet tóraǵalary Quryltaıdaǵy kópshilikten, ıaǵnı Ádilet partııasynyń fraktsııasynan saılanyp otyr.
