Quryltaı aldaǵy eki jylǵa arnalǵan respýblıkalyq bıýdjet jobasyn qaraıdy
ASTANA. KAZINFORM — Quryltaı Spıkeri Aıbek Dádebaıdyń tóraǵalyǵymen ótken Bıýro otyrysynda Quryltaıdyń aldaǵy otyrysynyń kún tártibi belgilendi. Depýtattardyń qaraýyna 2027-2029 jyldarǵa arnalǵan respýblıkalyq bıýdjet týraly zań jobasy jáne «Qazaqstan Respýblıkasynyń memlekettik nagradalary týraly» zańǵa engiziletin túzetýler shyǵarylady.
Quryltaıdyń aldaǵy otyrysynda «2027-2029 jyldarǵa arnalǵan respýblıkalyq bıýdjet týraly» zań jobasy birinshi oqylymda qaralady. Qujat Memleket basshysy alǵa qoıǵan negizgi mindetterdi iske asyrýǵa: makroekonomıkalyq turaqtylyqty saqtaýǵa, barlyq áleýmettik mindettemelerdi oryndaýǵa jáne ınfraqurylymdy ozyq túrde damytýǵa baǵdarlanǵan.
Jobaǵa sáıkes, aldaǵy orta merzimdi kezeńde JІÓ-niń ortasha ósý qarqyny 5,4% dep boljanady. Jyldyq ınflıatsııanyń 2027 jyldaǵy nysanaly dálizi 7,5-9,5% deńgeıinde, 2029 jylǵa qaraı 6%-ǵa deıin tómendeıdi dep aıqyndaldy. Osy ýaqytqa deıin respýblıkalyq bıýdjet tapshylyǵyn JІÓ-ge shaqqanda 0,4%-ǵa deıin qysqartý (1 trln teńge), al óz túsimderin 23,4 trln teńgege deıin ulǵaıtý josparlanyp otyr. Kelesi jyly shyǵystardyń negizgi baǵyty adamı kapıtalǵa ınvestıtsııalar salý, óńirlerdi qoldaý, ekonomıkanyń naqty sektory jáne basqa baǵyttardy qamtıdy.
Sonymen qatar, «Qazaqstan Respýblıkasynyń memlekettik nagradalary týraly» Zańǵa ózgerister men tolyqtyrýlar jobasy ekinshi oqylymda qaralady. Túzetýlerge Memleket basshysynyń tapsyrmasyn oryndaý maqsatynda Quryltaı depýtattary bastamashy boldy. Zań aıasynda mýzyka jáne beıneleý óneri salasyndaǵy eki jańa erekshelik belgisi — «Shámshi Qaldaıaqov» medalin jáne «Qazaqstannyń eńbek sińirgen sýretshisi» qurmetti ataǵyn engizý kózdelgen.
Eske salaıyq, buǵan deıin Quryltaıda 2027-2029 jyldarǵa arnalǵan respýblıkalyq bıýdjet jobasy tanystyrylǵan edi. Quryltaı vıtse-spıkeri Danııa Espaeva 2027 jyldyń bastapqy kezeńi áli de kúrdeli kúıinde qalyp otyrǵanyn aıtty.
