Qurylystaǵy otandyq materıaldardyń úlesin turaqty qadaǵalap otyrý kerek - Bektenov

ASTANA. KAZINFORM — Búgin Úkimet otyrysynda Premer-mınıstr Oljas Bektenov ımporttyq qurylys materıaldarynyń joǵary úlesi synǵa aldy.

- «Kazakh Invest» kompanııasy memlekettik organdarmen, ákimdiktermen, «Samuryq-Qazyna» qorymen jáne «Báıterek» holdıngimen birge osy jyldyń 1-shi sáýirine deıin aqparattyń tolyqtyǵy men durystyǵyn qamtamasyz ete otyryp, ulttyq tsıfrlyq ınvestıtsııalyq platformada jobalardyń ózekti pýlyn qalyptastyrsyn. Bul qoldanystaǵy jobalarǵa qoldaý sharalaryn kórsetý barysynda jedel sheshimder qabyldaýǵa múmkindik beredi, - dedi O. Bektenov.

Sonymen qatar ol Memleket basshysy Úkimettiń keńeıtilgen otyrysynda elimizde munaı-gaz hımııasy ónimderin óńdeý deńgeıi tómen ekenin ataǵanyn eske saldy.

- Atalǵan sala óńdeý ónerkásibindegi jańa baǵyttardy damytýǵa negiz bolýǵa tıis. Energetıka jáne Ónerkásip mınıstrlikterine «Samuryq-Qazyna» qorymen birlesip, keıin otandyq kompanııalardyń óńdeýine qajetti ishki naryqqa qoljetimdi polımer shıkizatyn jetkizýdiń ashyq ári turaqty sharttaryn qamtamasyz etýdi tapsyramyn. Ónerkásip mınıstrligi polımer ónimderin odan ári óńdeýge arnalǵan jobalardyń naqty pýlyn usynsyn, - dedi Úkimet basshysy.

Budan bólek Premer-mınıstr qurylys salasy dástúrli túrde ónerkásiptiń damýyna aıtarlyqtaı úles qosyp otyrǵanyn aıtty. Alaıda, bul salada, ásirese nysandardy jeke qarjy kózderiniń esebinen salý kezinde ımporttyq qurylys materıaldarynyń úlesi joǵary bolyp otyr.

- Ónerkásip mınıstrligine óńir ákimdikterimen birlesip, iri nysandardy, sonyń ishinde jeke ınvestıtsııalar esebinen júrgiziletin qurylys jumystarynda otandyq materıaldardyń úlesin turaqty túrde qadaǵalap otyrýdy tapsyramyn, - dedi Oljas Bektenov.

Buǵan deıin habarlanǵandaı, Premer-mınıstr mınıstrlikterge eksporttyq áleýeti joǵary jańa jobalardyń tizbesin usynýdy tapsyrdy.