Qurylysta aıla-sharǵy jasap júrgenderdiń joly kesiledi - Erbolat Dosaev
ALMATY. KAZINFORM – Almaty turǵyny qala ákimimen kezdesý barysynada taý bókterinde júrip jatqan qurylysqa shaǵymdanyp, bul aımaqtarda tekserý júrgizýdi usyndy.
Medeý aýdanynyń turǵyny taýly betkeılerge qurylys júrgizýge tyıym salynsa da, jaǵdaı áli shıelenisip turǵanyn jetkizdi.
«2 jyl buryn siz qyzmetke kirisken kezde 15 gradýstan asatyn taýly betkeılerde qurylysqa tyıym salý týraly zań qabyldansa da, qazir taý bókterindegi jaǵdaı shıelenisip tur. Sonymen qatar, sizdiń aralasýyńyzben observatorııa mańyndaǵy jerler demalys aımaǵyna aýystyryldy, bul qaýipsizdik úshin óte mańyzdy. Qazir erejelerdiń saqtalýyn eshkim baqylamaıdy, qurylys jumystary jalǵasyp jatyr. Qurylys salýshy jerdi JTQ (jeke turǵyn úı qurylysy) satyp alyp, kóppáterli turǵyn úı salyp, aılasyn asyrady. Barlyq taý bókterine aýdıt júrgizip, qaýipti jerlerdi anyqtaýdy ótinemin»,- dedi almatylyq.
Almaty ákimi Erbolat Dosaev qurylysta mundaı aıla-sharǵy jasap júrgenderdiń joly keseletinin aıtty.
«Prezıdenttiń óńirdiń seısmıkalyq qaýipsizdigin qamtamasyz etý jónindegi tapsyrmasyna Parlament qoldaý kórsetedi, biz qurylystaǵy mundaı aıla-sharǵynyń jolyn kesemiz. Qalanyń joǵarǵy bóligimen jáne taý bókterimen baılanysty qala qurylysyn baqylaýdy basqarý máselesi sheshilýde. Bul tek qazirgi qurylystarǵa ǵana qatysty emes. Bas jospar men ETJ túzetý aıasynda osy jerlerdiń barlyǵyn demalys aımaǵyna aýystyrdyq, ıaǵnı onda qurylysqa tyıym salynady. Árıne, qazirdiń ózinde kóptegen menshik ıesi shaǵym túsiretinin bilip otyrmyn, bárin zań aıasynda jasaımyz. Erekshe baqylaýǵa alamyz»,-dep jaýap berdi ákim.
Sonymen qatar, ol tikeleı aýdıt júrgize almaıtyndaryn jetkizdi.
«Tikeleı aýdıt jasaı almaımyz. Qazir biz taý baýraıynyń qosymsha geologııasyn júrgizip jatyrmyz, Almatynyń aınalasy birinshi jáne ekinshi tıptegi sazdy jer ekenin bilesizder. Mundaı jerlerge qurylys salýǵa bolmaıdy, otyryp ketedi. Buǵan biryńǵaı káriz jelisiniń bolmaýy, taýdy otyrǵyzatyn septıkter syndy ekonomıkalyq sharýashylyqty qosyńyz. Qurylystar toqtady, munymen qala qurylysyn baqylaý basqarmasy aınalysady. Qazir biz seısmo aýdıtti qaıta qarastyramyz, Almaty qalalyq josparlaý jáne ýrbanıstıka basqarmasy Bas josparǵa saı qaýipti aımaqtar kartasy boıynsha tıisti usynystar engizemiz»,- dep qosty Erbolat Dosaev.
