Qurylysshy, agronom, elektrık: qazaqstandyqtar elge eń qajet mamandyqtardy atady
ASTANA. KAZINFORM — Eńbek kúni qarsańynda qazaqstandyqtar eldiń bolashaǵy úshin eń mańyzdy dep sanaıtyn jumysshy mamandyqtardy atady. Bul týraly QR Eńbek jáne halyqty áleýmettik qorǵaý mınıstrligi habarlady.
Mınıstrlik eGov platformasynda azamattar arasynda saýalnama júrgizip, jumysshy mamandyqtarǵa degen kózqarasty jáne eńbek adamdarynyń qoǵamdaǵy ornyn zerttegen. Saýalnamaǵa 1 305 adam qatysty.
Zertteý nátıjesine sáıkes, qazaqstandyqtardyń 76,2%-y eńbek adamyna qurmet kórsetýdi mańyzdy qoǵamdyq qundylyq dep esepteıdi.
Al eldiń aldaǵy damýy úshin eń qajet mamandyqtardyń kóshin qurylysshylar bastady. Respondentterdiń 20,3%-y qurylys salasynyń mamandaryn el úshin asa mańyzdy dep ataǵan.
Odan keıingi oryndarda:
-
aýyl sharýashylyǵy qyzmetkerleri — 16,7%;
-
ónerkásip óndirisiniń mamandary — 14,8%;
-
elektr mamandary — 14,4%.
Saýalnamaǵa qatysýshylar dánekerleýshi, kommýnaldyq qyzmet mamany, mehanık, júrgizýshi, aspaz, slesar jáne mashınısterdiń eńbegin de joǵary baǵalaǵan.
Zertteý barysynda eńbek adamdarynyń jetistikteri de suralǵan. Respondentterdiń 19,5%-y búkil elge úlgi bolarlyq jumysshy mamandardy naqty biletinin aıtqan. Al 51,6%-y jumysshy mamandardyń jetistigi tutas bir salanyń damýyna qosqan úlesimen mańyzdy ekenin atap ótken.
Sonymen qatar saýalnamaǵa qatysqandardyń 47,7%-y eńbek adamdarynyń qoǵamdaǵy jaǵdaıyna jáne osy baǵytta memleket qabyldap jatqan sharalarǵa kóńili tolatynyn bildirgen.
Al 41,2% respondent jumysshy mamandyqtardyń bedelin arttyrý jáne olardyń qoǵamdaǵy mártebesin kóterý baǵytyndaǵy jumysty jalǵastyryp, qosymsha sharalar qabyldaý qajet dep sanaıdy.
Osylaısha, saýalnama nátıjesi qazaqstandyqtardyń eńbek adamdarynyń el damýyndaǵy rólin joǵary baǵalaıtynyn kórsetti. Sonymen birge jumysshy mamandyqtardyń bedelin arttyrý máselesi áli de ózekti bolyp otyr.
Caýalnamaǵa 1 305 adam qatysty. Olardyń 53,1%-y — áıelder, 46,9%-y — erler. Qatysýshylardyń 61,2%-y saýalnama kezinde jumys istep júrgen azamattar bolǵan.
Eske salaıyq, buǵan deıin Qazaqstanda sheteldikterge arnalǵan suranysqa ıe mamandyqtar tizimi keńeıtiletinin jazǵanbyz.
