Qurylyspen aınalysýǵa ruqsat alǵan kompanııalardyń bári tekserýden ótýi múmkin
ASTANA. KAZINFORM – Májilis janyndaǵy Qoǵamdyq palatanyń otyrysynda Qurylys kodeksiniń jobasy talqylanyp jatyr.

Qujatty tanystyrǵan Ónerkásip jáne qurylys vıtse-mınıstri Qýandyq Qajkenov jańa kodeks kúshine ense, buǵan deıin qurylyspen aınalysýǵa memleketten ruqsat alǵan kásiporyndardyń bárine revızııa jasalatynyn aıtty.
- Barlyq berilgen ruqsatqa tekserý júrgizý josparlanyp otyr. Bul qurylys kompanııalaryndaǵy jumysshylar sany men materıaldyq resýrstardyń kólemin naqty ýaqyt rejıminde baqylap, naryqtan biliktiligi joq kompanııalardy alastatýǵa múmkindik beredi, - dedi ol.
Eske salsaq, Kazinform uzaq ýaqyt boıy ári qyzý talqylanyp kele jatqan Qurylys kodeksi jobasynyń aınalasynda qandaı syn men shaǵym bar ekenine sholý jasaǵan edi.
Sondaı-aq elimizde qurylys kodeksi ázirlenip jatqanyn jazǵan bolatynbyz. Sonymen qatar Sharlapaev qurylys pen metallýrgııa salasynda paıda bolǵan jańa mamandyqtardy ataǵan edi.