Qurylysqa ruqsat beretin qujatyn kórmeı, turǵyn úıge qarjy salmańyz – maman keńesi

ASTANA. KAZINFORM – Turǵyn úı qurylysyna qarjy salǵan kezde kompanııanyń qurylysqa ruqsatynyń bar-joǵyna kóz jetkizip baryp, qarjy salý qajet. Mundaı keńesti Astana qalalyq zań konsýltanttary palatasynyń múshesi Ardaq Ábeýova berip otyr.

- Qurylys kompanııasyna barǵan kezde eń aldymen ruqsat qaǵazyn suraý qajet. Máselen, men aqshamdy bergennen keıin suraýǵa, bilýge quqyǵym bar. Jarnamasynda «osyndaı úı, páter bolady, 1 bólme, 3 bólme alasyz» degendeı derekter keltiredi. Osy kezdegi eń mańyzdy másele - qujattarǵa mán berý. Eger qujattaryn kóretpese, turǵyn úı qurylysyna qarajat salmańyz. Nemese Memlekettik sáýlet-qurylys baqylaý organyna baryp ta tekserýge bolady, - dedi zańger.

«Astana qalasynyń qalalyq orta sapasy jáne baqylaý basqarmasy» MM basshysy Ǵanı Tajıevtiń aıtýynsha, elordada salynyp jatqan turǵyn úılerdiń qurylysyna ruqsattyń bar-joǵy qalalyq memlekettik sáýlet-qurylys basqarmasynyń resmı saıtynda ornalastyrylǵan.

- Qazirgi kezde qalada jalpy aýmaǵy 8 mln sharshy metrdi quraıtyn 262 turǵyn úı kesheni salynyp jatyr. olardyń ruqsaty barlaryn saıtqa ornalastyryp otyramyz. Adamdar kóbine jarnamaǵa senip qalady. Sonymen qatar senip qalý sebebi qarjyǵa da baılanysty. Tómen baǵamen satady. Arzan baǵamen usynylǵan turǵyn úı kesheni birden kúmán týdyrady. Arzan bolýy múmkin emes. Óıtkeni, 1 sharshy metrge qansha qarajat ketetinin bilemiz. Osyǵan oraı qoldanatyn sharamyz da az, qolymyz qysqa. Baryp aıyppul salamyz, ol mardymsyz. Degenmen, prokýratýramen, Polıtsııa departamentimen jumys istep jatyrmyz, - dedi ol.

Basqarma basshysy jalǵan jarnama bergen qurylys kompanııalaryna da 300 AEK (1 107 600 teńge) mólsherinde aıyppul salynatyndyǵyn aıtady.

«Astana qalasynyń qalalyq orta sapasy jáne baqylaý basqarmasy» MM basshysy Ǵanı Tajıev elordada úleskerler problemasynyń týyndaýyna túrtki bolatyn jaıttardy atady.