Qurylysqa ruqsat almaǵan kompanııalar úleskerler arasynda jarnama jasaı almaıdy
ASTANA. KAZINFORM — Turǵyn úıdi úlestik tártipte salatyndarǵa qurylys nysandaryn ruqsatsyz jarnamalaýǵa tyıym salynady. Bul norma búgin Parlament Májilisinde tanystyrylǵan elordany jáne respýblıkalyq mańyzy bar qalalardy damytý máselelerine arnalǵan zań jobasynda qamtylǵan.
«Qazirgi kezde kóppáterli turǵyn úı salýǵa ruqsat alǵanǵa deıin úleskerlerdiń aqshasyn tartý úshin jarnamany júzege asyrýǵa tosqaýyl bolmaǵanyn paıdalanyp, qurylys salýshylar jarnamany bastap ketedi. Osy máseleni sheshý úshin «Turǵyn úı qurylysyna úlestik qatysý týraly» Zańy aıasynda tıisti ruqsat alǵannan keıin ǵana qurylys salýshylarǵa kóppáterli turǵyn úı qurylysyn jarnamalaýǵa múmkindik berý usynyldy», - dedi Ulttyq ekonomıka vıtse-mınıstri Baýyrjan Omarbekov.
Sonymen qatar, Ákimshilik quqyq buzýshylyq týraly kodeksine ózgerister engizý turǵysynda qurylys salýshynyń úlestik qatysý týraly zańnama talaptaryn buzǵany úshin aıyppuldy ulǵaıtý qarastyryldy.
«Astana qalasynyń «jasyl» beldeýi erekshe kútimdi talap etedi. Qazirgi ýaqytta jasyl beldeý jerleriniń qysqarýyna nemese búlinýine jol bermeý qajet.
Osyǵan baılanysty «Astana mártebesi týraly» Zańy aıasynda qalanyń sanıtarlyq-qorǵaý «jasyl» aımaǵyn basqarý qaǵıdalaryn bekitý jáne ony kútip-ustaıtyn zańdy tulǵany aıqyndaý, «jasyl» aımaqtyń shekaralaryn ózgertýdi jergilikti atqarýshy organnyń usynýy boıynsha Úkimettiń júzege asyrýy, sondaı-aq «jasyl» aımaqta landshafttardyń tabıǵı kórinisine teris áser etetin qyzmetke tyıym salý usynyldy», - dedi vıtse-mınıstr.
Budan buryn habarlanǵandaı, búgin Parlament Májilisinde «Qazaqstan Respýblıkasynyń keıbir zańnamalyq aktilerine astanany jáne respýblıkalyq mańyzy bar qalalardy damytý máseleleri boıynsha ózgerister men tolyqtyrýlar engizý týraly» zań jobasy tanystyryldy.
Páterde turmaıtyn adamdardy tirkeýden shyǵarmaǵany úshin turǵyn úı ıesine aıyppul 2 esege ósedi.
