Qurylysy uzaqqa sozylǵan áleýmettik nysandar endi antıkordyń baqylaýynda
ASTANA. KAZINFORM – Agenttik qurylysy aıtarlyqtaı uzaqqa sozylǵan áleýmettik nysandardy súıemeldeý boıynsha jumysty jalǵastyryp otyr. Bul týraly Sybaılas jemqorlyqqa qarsy is-qımyl Agenttiginiń baspasóz qyzmeti málim etti.
Málim bolǵandaı, Agenttiktiń aýmaqtyq departamentteri 44 problemalyq nysannyń qurylysyn aıaqtaýdy qamtamasyz etken.
Olardyń ishinde sýmen qamtamasyz etý obektileri, Mamandandyrylǵan HQKO, dene shynyqtyrý-saýyqtyrý keshenderi, mektepter, medıtsınalyq obektiler, turǵyn úıler, joldardy jóndeý, kópir salý, bóget gıdrotoraby men qazandyqty rekonstrýktsııalaý bar.
Atap aıtqanda, Astana qalasynda, Aqtóbe, BQO — 10, Qyzylorda jáne Túrkistan oblystarynda 4 mekteptińqurylysy aıaqtaldy.
«Aýyldyq jerlerdi sýmen qamtamasyz etý problemalaryn nazarǵa ala otyryp, súıemeldeý sheńberinde 14 aýylda, onyń ishinde Pavlodar oblysynda — 4, ShQO — 3, Jambyl oblysynda — 3, Qostanaı oblysynda — 3 jáne BQO — 1 sý qubyrlarynyń qurylysy aıaqtaldy. Olardyń qurylysy bir jyldan úsh jylǵa deıin sozylǵan», — delingen habarlamada.
Agenttiktiń bastamasy boıynsha uzaq qurylystardyń problemalyq máseleleri óńirlerdiń ákimderi janyndaǵy jemqorlyqqa qarsy is-qımyl máseleleri jónindegi vedomstvoaralyq komıssııalardyń 26 otyrysynda jáne Qoǵamdyq keńesterdiń 25 otyrysynda qaraldy.
«Jymqyrýǵa jol bermeý maqsatynda aldyn alý sharalarynyń kesheni, onyń ishinde aqparattyq hattar, jemqorlyqqa qarsy is-qımyl jónindegi komıssııalar, „Sybaılas jemqorlyqqa qarsy volonterlik“ jobasy sheńberinde qoǵamdyq monıtorıngter qoldanylady. Máselen, Shymkent qalasynda aqparattyq hat engizý arqyly Qonaev dańǵylynyń qurylysy aıasynda 700 metrge jýyq artyq tirek qabyrǵalaryn ornatýǵa baǵyttaý josparlanǵan 3,2 mlrd teńge bıýdjet qarajatyn únemdeýge múmkindik týdy, jumystar alynyp tastaldy», — dep habarlady Agenttiktiń baspasóz qyzmeti.
Sondaı-aq, Shymkent qalasynda uzaq qurylystardy súıemeldeý sheńberinde «Sáýlet, qala qurylysy jáne qurylys qyzmeti týraly» Zańǵa sáıkes qurylystyń kepildik merzimderin aıqyndaý boıynsha ekiushty praktıka belgilendi, kepildik merzimi keminde 2 jyldy quraıdy, bul rette Azamattyq kodeks boıynsha, eger shartta ózgeshe kózdelmese, kepildik merzimi 10 jyldy quraıdy.
«Kepildik merzimine naqty talaptyń bolmaýy jemqorlyq táýekelderin týdyrady, óıtkeni tapsyrys berýshi merdigermen aldyn ala ýaǵdalastyq boıynsha kepildiktiń qysqa merzimin belgileı alady. Osyǵan baılanysty, Shymkent qalasynyń Qurylys, jolaýshylar kóligi jáne avtomobıl joldary, energetıka jáne ınfraqurylym basqarmalarynyń buıryqtarymen qurylystyń kepildik merziminiń tıisti talaptaryn tehnıkalyq erekshelikter men memlekettik satyp alý jónindegi sharttarda keminde 7 jyl kórsetý mindettiligi bekitildi», — delingen habarlamada.
Osyǵan uqsas jumysty Agenttiktiń basqa da aýmaqtyq departamentteri júrgizedi.
Bul jumystyń nátıjeleri sapany qosymsha baqylaýdy kúsheıtý jáne kepildik merzimi kezeńinde jóndeý bıýdjetiniń shyǵyndaryn azaıtý bolady.
Qazir Agenttiktiń bastamasy boıynsha Qurylys kodeksiniń jobasyna eń tómengi kepildik merzimin keminde 5 jyl belgileý týraly normalar engizildi, aǵymdaǵy sátte — 2 jyldy quraıdy.
Agenttik 125 nysannyń qurylys jumystaryn súıemeldeıdi.
Bul baǵyttaǵy jumys jalǵasatyn bolady.
