Qurylysy áli bitpegen úıden páter alar kezde neni bilý kerek
ASTANA. KAZINFORM – «Qazaqstan turǵyn úı kompanııasy» aktsıonerlik qoǵamynyń basqarma tóraǵasy Altaı Kúzdibaev úleskerlik qurylysqa aqsha salǵan kezde aldanbaý úshin ne isteý kerektigin aıtty.
«Bizdiń azamattar qurylysy áli bitpegen nysannan páter satyp alatyn kezde eń áýeli satý bóliminen nysannyń qujattaryn tekserý kerek. Qurylysqa úleskerdiń aqshasyn tartýǵa ruqsat beretin ákimdiktiń nemese «Qazaqstan turǵyn úı kompanııasy» aktsıonerlik qoǵamynyń kepildigi bolý kerek. Osy qujattar boıynsha homeportal.kz resýrsynan atalǵan nysan týraly aqparattardy teksere alady. Ol resýrsta salynyp jatqan nysannyń orny, qashan salynyp bitetini, qoldanysqa qashan beriletini, neshe páterlik úı ekeni, tehnıkalyq qadaǵalaýdy qandaı kompanııa júrgizetini, qurylysqa qandaı kompanııa jaýapty ekeni týraly málimettiń bári bar. Jyl aıaǵyna deıin osy portaldan úleskerlerdi onlaın qoldaý ortalyǵyn ashamyz. Bul málimetter portalda joq bolsa, ol nysannyń salynyp bitetinine memleket kepildik bergen joq degen sóz. Al men ataǵan málimettiń bári portalda bolsa, satý bóliminde satý-satyp alý kelisimshartyn jasaǵanda árbir sózdi muqııat oqyp, mánin túsiný kerek. Úleskerlik qatysýdyń kelisimsharty Ónerkásip jáne qurylys mınıstriniń buıryǵymen bekitilgen tıptik úlgi boıynsha jazylady. Ózińiz qol qoıatyn kelisimshart sol tıptik formaǵa sáıkes kele me, joq pa degendi qaraý kerek», - deıdi ol.
Sondaı-aq, úlesker aqshasyn tartýǵa ruqsaty joq nysannan páter satyp alǵan adamnyń quqyǵyn erteń eshkim qorǵamaıtynyn eskertedi.
«Taǵy da qaıtalap aıtamyn, jobalaý-smetalyq qujattary men úlesker aqshasyn tartý ruqsatyn kórsetpegen kompanııadan aýlaq bolǵan durys. Ondaı ruqsatty jergilikti ákimdik nemese Qazaqstan turǵyn úı kompanııasy beretinin aıttym. Osy eki qujatty suraý kerek. Bul qujattar bolmasa, erteń satyp alǵan úıińiz salynyp bitpeı qalsa, zań da, ákimdik te sizge kómektese almaıdy. Quqyǵyńyz 100 paıyz buzylady. Ákimdikke barsańyz quqyq qorǵaý organdaryna silteýmen shekteledi. Óıtkeni ákimdik kepildik bermegen nysanǵa aqsha salǵan bolyp shyǵasyz», - dedi Altaı Kúzdibaev.
