Qurylysy 5 jyl buryn toqtap qalǵan Qyzylorda sý toraby paıdalanýǵa berildi
ASTANA. KAZINFORM — Sý resýrstary jáne ırrıgatsııa mınıstrligi qurylysy 5 jyl buryn toqtap qalǵan Qyzylorda sý torabyn jańǵyrtý jobasyn aıaqtady.
Sý resýrstary jáne ırrıgatsııa mınıstrligi qurylysy 5 jyl buryn toqtap qalǵan Qyzylorda sý torabyn jańǵyrtý jobasyn aıaqtady. Nysan 2022 jyly qoldanysqa berilýi kerek edi. Alaıda, pandemııa men qarjylyq qıyndyqtarǵa baılanysty qurylys jumystary toqtap qalǵan bolatyn. Mınıstrlik qurylǵannan keıin Qyzylorda sý torabynyń qurylysy qaıta jandandy. Nysannyń sapaly jumysyn qamtamasyz etý maqsatynda gıdravlıkalyq toraptyń buzylǵan bólshekteri qaıta jóndelip, basqa da aqaýlary durystaldy.
Aıta ketý kerek, sý toraby Syrdarııa ózeniniń sol jáne oń jaǵalaýyndaǵy 120 myń gektarǵa jýyq jerdi sýarýǵa jáne shamamen 2 mln gektarǵa jýyq shóldi aımaqty ylǵaldandyrýǵa arnalǵan.
— Qurylysy toqtap qalǵan nemese sozylyp ketken jobalardy aıaqtaý máselesi mınıstrliktiń jiti baqylaýynda. Máselen, Aqtóbe sý qoımasyna 36 jylda alǵash ret keshendi rekonstrýktsııa jasaldy. Al, Batys Qazaqstan oblysynda sońǵy 58 jylda birinshi ret Kırov sý qoımasy jóndeldi. Búgingi tańda Esqula, Talap, Presnovskıı jáne Sokolovskıı taptyq sý qubyrlarynyń qurylysyn aıaqtaý boıynsha da belsendi jumys júrip jatyr. Bul jobalar halyqty sapaly sýmen qamtamasyz etýge baǵyttalǵan. Sol sebepti atalǵan jobalardy iske asyryp, mejesine jetkizý óte mańyzdy, — dedi Sý resýrstary jáne ırrıgatsııa mınıstri Nurjan Nurjigitov.
Eske salsaq, osyǵan deıin apatty jaǵdaıdaǵy Orta Terekti sý qoımasyn jóndemese aýyldy sý basýy múmkin ekeni aıtyldy.