Qurylys jobalaryn josparlaý kezinde óńirlerdiń naqty qajettiligi eskerilýi tıis — QSZI
ASTANA. KAZINFORM — Qazaqstanda iri ınfraqurylym jobalaryn júzege asyrǵanda ár óńirdiń naqty qajettiligin anyqtap, salynǵan nysandardyń halyq turmysyna tıgizetin áserin baǵalaý qajet. Bul týraly QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Jandos Shaımardanov Astanada ótken sarapshylyq talqylaýda aıtty.
QSZI dırektorynyń pikirinshe, qurylys baǵdarlamalarynyń nátıjesin tek paıdalanýǵa berilgen nysandar sanymen ólsheý jetkiliksiz. Jańa mektep, aýrýhana nemese joldyń turǵyndarǵa qanshalyqty qajet ekeni jáne onyń óńir ekonomıkasyna qandaı múmkindik beretini de nazarǵa alynýy kerek.
— Baǵdarlamanyń aýqymy josparlaý sapasy men resýrstardy tıimdi paıdalanýǵa qoıylatyn talaptardy kúsheıtedi. Salynǵan nysandardyń sanyn ǵana emes, olardyń adamdardyń ómirin qanshalyqty jaqsartatynyn jáne qandaı jańa ekonomıkalyq múmkindikter ashatynyn da baǵalaý qajet. Ol úshin óńirlerdiń qajettiligin jan-jaqty zerdeleý, ınvestıtsııalyq jobalardy obektıvti baǵalaý jáne olardyń oryndalýyn baqylaýdyń zamanaýı quraldary kerek, — dedi Jandos Shaımardanov.
Onyń aıtýynsha, ınfraqurylymdyq jobalardy ónerkásiptiń, turǵyn úı qurylysynyń jáne óńirlik ekonomıkanyń damý josparlarymen ózara baılanystyrý mańyzdy. Bul rette memlekettik organdar, damý ınstıtýttary, qarjy uıymdary men jeke kásipkerlerdiń jumysy bir-birinen bólek júrgizilmeýi tıis.
QSZI basshysy memlekettik ınvestıtsııanyń mindeti jeke bıznestiń ornyn basý emes, kerisinshe, onyń iri jobalarǵa qatysýyna qolaıly jaǵdaı jasaý ekenin atap ótti.
Budan bólek, Jandos Shaımardanov qurylys jobalaryn uzaq merzimdi ekonomıkalyq josparlaýmen ushtastyrý qajettigine de toqtaldy. Onyń sózinshe, búgin qabyldanatyn sheshimder Qazaqstannyń ınfraqurylymdyq, ónerkásiptik jáne aýmaqtyq damýyna aldaǵy ondaǵan jyl boıy áser etedi.
Osy turǵydan alǵanda, ǵylymı-saraptamalyq uıymdardyń zertteýleri memlekettik sheshimderdiń negizdiligin arttyrýǵa yqpal ete alady.
— Búgin biz Qazaqstannyń aldaǵy ondaǵan jyldaǵy ınfraqurylymdyq, ónerkásiptik jáne aýmaqtyq kelbetin aıqyndaıtyn sheshimder qabyldap jatyrmyz. Sondyqtan jekelegen jobalar men bıýdjettik kezeńderdiń sheńberinen shyǵyp, uzaq merzimdi bolashaqty eskerý mańyzdy, — dedi ınstıtýt dırektory.
Aıta keteıik, buǵan deıin elimizde «Jalpyhalyqtyq aýqymdy qurylys» baǵdarlamasyn júzege asyrý úshin 2029 jyldyń sońyna deıin Ulttyq qordan 6,5 trıllıon teńge bólý josparlanǵany habarlandy.
