Qurylys jobalaryn tekserý ýaqyty eki ese qysqarýy múmkin
ASTANA. KAZINFORM – Qazaqstanda qurylys salasyn tsıfrlandyrý jumysy jalǵasyp jatyr. Qazir aýmaqty josparlaýdan bastap nysandy paıdalanýǵa berýge deıingi barlyq kezeńdi qamtıtyn biryńǵaı tsıfrlyq júıe engizilip jatyr. Bul týraly OKQ alańynda ótken brıfıngte QR Ónerkásip jáne qurylys vıtse-mınıstri Jánnat Dúbirova aıtty.
Onyń aıtýynsha, júıeniń negizgi tetikteriniń biri — memlekettik qala qurylysy kadastry. Onda eldiń bas josparlary, egjeı-tegjeıli josparlaý jobalary jáne ınjenerlik jelilerge qatysty málimetter jınaqtalǵan.
— Derekter bir júıege jınaqtalǵannan keıin olardy taldaýǵa múmkindik týady. Sonyń biri — kompıýterlik kórý tehnologııalary men keńistiktik derekterdi óńdeý quraldaryn paıdalaný. Bul naqty qurylys pen bekitilgen qala qurylysy qujattary arasyndaǵy sáıkessizdikterdi jedel anyqtaýǵa múmkindik beredi, — dedi vıtse-mınıstr.
Onyń sózinshe, bul úshin tsıfrlyq kartalar, sýretter jáne avtomatty taldaý júıeleri qoldanylady. Aldyn ala baǵalaý boıynsha tekserý ýaqyty birneshe kúnnen birneshe saǵatqa deıin qysqarady.
Sonymen qatar jobalar men qujattardy tekserýdi avtomattandyrý jumysy bastalǵan. Júıe bas josparlar men egjeı-tegjeıli josparlaý jobalaryndaǵy málimetterdi avtomatty túrde salystyryp, sáıkessizdikterdi anyqtaıdy.
Vıtse-mınıstrdiń aıtýynsha, bul bir jobany tekserý ýaqytyn 16 saǵattan 8 saǵatqa deıin qysqartýǵa múmkindik beredi. Sonyń nátıjesinde artyq jumys azaıyp, adamı faktordyń yqpaly tómendeıdi.
Aıta keteıik, buǵan deıin Qazaqstanda jer qoınaýyn paıdalanýdyń Biryńǵaı platformasy arqyly 729 lıtsenzııa berilgeni habarlanǵan edi.
