«Qurylys jáne taǵy da qurylys»: óńirlerde jańa áleýmettik ınfraqurylym nysandary iske qosyldy
ASTANA. KAZINFORM — Memleket basshysynyń tapsyrmalaryn júzege asyrý aıasynda el óńirlerinde kólik, ınjenerlik, ónerkásiptik jáne áleýmettik ınfraqurylymdy damytý jumystary jalǵasyp jatyr. Ótken aptada elimizde jańa óndiristik kásiporyndar paıdalanýǵa berilip, respýblıkalyq mańyzy bar avtojoldardyń ýchaskelerinde jóndeý jumystary aıaqtaldy, aýyldyq eldi mekenderdi gazben qamtý jalǵasty, sondaı-aq jańa áleýmettik, tsıfrlyq jáne órt qaýipsizdigi nysandary ashyldy. Bul týraly Úkimettiń baspasóz qyzmeti habarlady.
Qurylys jumystary bastaldy
Aqtóbe oblysynyń Yrǵyz aýdanynda bir aýysymda 300 naýqasty qabyldaýǵa arnalǵan emhana qurylysy bastaldy. Jobanyń quny – 1,3 mlrd teńge. Qurylysqa qajetti qarajat Infraqurylymdy damytý qorynan bólindi. Nysandy paıdalanýǵa berý aýdan turǵyndaryn medıtsınalyq kómektiń barlyq túrimen tolyq qamtýǵa múmkindik beredi.
Paıdalanýǵa berilgen nysandar
Aqtóbe qalasynda alıýmınıı konstrýktsııalaryn shyǵaratyn óndiristik keshen iske qosyldy. Kásiporyn terezeler, esikter men vıtraj júıelerin esepteý men jobalaýdan bastap, boıaý, stanoktarda óńdeý, qurastyrý jáne daıyn ónimdi qaptaýǵa deıingi tolyq tehnologııalyq tsıkldi qamtıdy. Jańa óndiris orynynyń iske qosylýy óńdeý ónerkásibin damytýǵa jáne óńir ekonomıkasyn ártaraptandyrýǵa baǵyttalǵan.
Qyzylorda oblysynyń Qazaly aýdanyndaǵy Janqoja batyr jáne Ú.Túktibaev aýyldary tabıǵı gazben qamtyldy. Jyl sońyna deıin óńirde taǵy 10 eldi mekendi gazben qamtamasyz etý josparlanyp otyr. Nátıjesinde oblysty gazben qamtý deńgeıi 85%-ǵa jetedi.
Ulytaý oblysynda respýblıkalyq mańyzy bar «Jezqazǵan – Arqalyq – Petropavl» avtojolynyń 109 shaqyrymdyq bóliginde ortasha jóndeý jumystary aıaqtaldy. Júrgizilgen jumystar aıasynda 17 sý ótkizý qubyry ornatylyp, jańartyldy. Sondaı-aq Balǵa kópirinde jóndeý jumystary júrgizildi.
Abaı oblysynda mańyzy bar «Qaraǵandy – Aıagóz – Tarbaǵataı – Boǵas» avtojolynyń 66 shaqyrymdyq «Aıagóz – Tarbaǵataı» ýchaskesindegi ortasha jóndeý jumystary aıaqtaldy. Nátıjesinde eldi mekender arasyndaǵy jol júrý ýaqyty 2 saǵattan 40 mınýtqa deıin qysqardy. Jumys barysynda jol negizi nyǵaıtylyp, jańa asfaltbeton jabyny tóseldi, sý ótkizý qurylystary jańartylyp, aıaldama pavılondary, jaryqtandyrý júıesi jáne sanıtarııalyq nysan ornatyldy.
Abaı oblysynda respýblıkalyq mańyzy bar «Semeı – RF shekarasy» avtomobıl jolynyń 111 shaqyrymynda jóndeý jumysy tolyq aıaqtaldy. Úsh ýchaskede jol jabyny jańartylyp, sý ótkizý qubyrlary jóndeldi, demalys alańy abattandyrylyp, eki avtopavılon jáne jol boıyna maldyń shyǵýyna tosqaýyl bolatyn 10 shaqyrym qorshaý ornatyldy. Táýligine 1,6 myńnan astam kólik ótkizetin tas jol óńirdegi eń iri «Aýyl» shekaralyq ótkizý pýnktine aparady. Pýnktti rekonstrýktsııalaý aıasynda júk kólikterine arnalǵan aýdany 2,8 myń sharshy metr kútý alańy da salyndy.
Soltústik Qazaqstan oblysynyń Aqjan aýylynda 400 bas iri qaraǵa arnalǵan taýarly-sút fermasy salyndy. Memlekettik qoldaý nátıjesinde kásiporyn jeńildetilgen baǵdarlamalar aıasynda golshtın tuqymdy 400 bas iri qara satyp aldy. Nysandy paıdalanýǵa berý 2027 jyldyń birinshi toqsanyna josparlanǵan.
Soltústik Qazaqstan oblysynda jańa formattaǵy tsıfrlyq keńse (AI-keńse) ashyldy. Ol tólqujattar men jeke kýálikterdi rásimdeýge arnalǵan jedel qyzmet kórsetý aımaǵyna, óz betinshe onlaın qyzmet alý aımaǵyna jáne sarapshylyq keńes berý sektoryna bólingen. Sondaı-aq ortalyqta elektrondyq qyzmetterdi paıdalaný boıynsha halyqty aqysyz oqytý uıymdastyrylǵan.
Túrkistan oblysy Jetisaı aýdanyndaǵy Qyzylqum aýyldyq okrýgine qarasty Kóbek jáne Aqbulaq eldi mekenderi tabıǵı gazǵa qosyldy. Jańa jelilerdiń iske qosylýy nátıjesinde aýdandaǵy 105 aýyldyń 95-i gazben qamtamasyz etildi. Gazben qamtý deńgeıi 90,4%-ǵa jetti.
Aqtóbe oblysy Qaratoǵaı aýylynda jańa órt sóndirý beketi ashyldy. Ol 460 turǵynnyń órt qaýipsizdigin qamtamasyz etedi. Toǵyz adamnan turatyn bólimshege órt sóndirý kóligi, jaýyngerlik kıim-keshek jáne baılanys quraldary berildi. Bir qabatty ǵımaratta dıspetcherlik bólme, demalys jáne tamaqtaný bólmeleri, sondaı-aq sanıtarlyq-turmystyq oryndar qarastyrylǵan.
Aıta keteıik, Qazaqstanda magıstraldyq qubyrlardyń kúzet aımaqtarynyń saqtalýyna tsıfrlyq baqylaý kúsheıtildi.