Qurylys salasyndaǵy normatıvterdi retteıtin ulttyq ınstıtýt qurylady

ASTANA. KAZINFORM – Qurylys zańnamasyn óreskel buzǵan kompanııalarǵa qurylyspen aınalysýǵa tyıym salynýy múmkin. Bul týraly Ónerkásip jáne qurylys vıtse-mınıstri Qýandyq Qajkenov Májilis janyndaǵy Qoǵamdyq palatanyń otyrysynda aıtty.

- Ulttyq tehnıkalyq normalaý ınstıtýtyn aıqyndaý kózdeledi. Onyń negizgi mindeti azamattardyń qaýipsizdigin jáne múliktiń saqtalýyn nyǵaıtýǵa baǵyttalǵan tehnıkalyq normatıvtik talaptardy ázirlep, engizý bolady. Ol uıymǵa Belarýs pen Reseı Federatsııasynyń tájirıbesi boıynsha qurylys normalary salasyndaǵy ulttyq ınstıtýt mártebesi beriledi dep boljanyp otyr, - dedi Qýandyq Qajkenov.

Onyń sózinshe, sala uıymdaryn sertıfıkattaý fýnktsııasy básekeli ortaǵa berilýi múmkin.

- Budan basqa, qurylys salasynda óreskel buzýshylyqtarǵa jol berilgen jaǵdaıda qyzmetti júzege asyrýǵa tyıym salý múmkindigimen qurylys naryǵyna qatysýshylardyń ortaq jaýapkershiligin belgileý josparlanyp jatyr, - dedi vıtse-mınıstr.

Eske salsaq, Kazinform uzaq ýaqyt boıy ári qyzý talqylanyp kele jatqan Qurylys kodeksi jobasynyń aınalasynda qandaı syn men shaǵym bar ekenine sholý jasaǵan edi. 

Sondaı-aq elimizde qurylys kodeksi ázirlenip jatqanyn jazǵan bolatynbyz.