Qurylys salasyndaǵy kemshilikterge endi qoǵamdyq monıtorıng júrgiziledi
ASTANA. KAZINFORM — Jańa Konstıtýtsııa kúshine engennen keıingi alǵashqy Joldaý bıyl «Jańa tarıhı kezeńdegi Qazaqstannyń ózekti mindetteri» dep atalyp, ol eldiń odan ári damýynyń praktıkalyq basymdyqtaryn aıqyndap berdi, dep habarlaıdy Astana ákimdiginiń resmı saıty.
Joldaýdyń basty ıdeıasy — eldiń ekonomıkalyq, qarjylyq jáne tehnologııalyq múmkindikterin azamattardyń ál-aýqatyn arttyrýǵa baǵyttaý.
Osy ıdeıany túrli uıymdar arasynda túsindirý maqsatynda bir top qoǵam ókilderi Astanada birneshe mekemede kezdesý ótkizdi.
Mańyzdy qujattaǵy ekonomıka, kásipkerlik jáne ınvestıtsııa, izgilik qasıetterin damytý taqyrybyn taldaǵan jumys tobynyń quramynda Quryltaı depýtaty, fılologııa ǵylymdarynyń doktory, professor Dıhan Qamzabekuly, Qazaqstan Halyq Keńesiniń múshesi, osy keńestiń Óńirlik damý jáne jergilikti ózin-ózi basqarý komıtetiniń tóraǵasy Tabıǵat Zeınulqabden, Qazaqstan Halyq Keńesiniń múshesi, jazýshy, dramatýrg Roza Muqanova jáne Ulttyq ekonomıka birinshi vıtse-mınıstri Azamat Ámrın boldy. Top ókilderi «Atameken» kásipkerler palatasynda kásipkerlermen, Nazarbaev Ýnıversıtetinde stýdenttermen jáne Esil aýdany ákimdiginde memlekettik qyzmetkerlermen kezdesip, Joldaýdyń mańyzdy tustaryn tereńnen taldap túsindirdi. Sondaı-aq qatysýshylardyń suraqtaryna jaýap berdi.
Spıkerler Prezıdent naqty tapsyrmalardy, qarjy resýrstary men merzimdi aıqyndaǵanyn alǵa tartyp, olardy iske asyrý úshin Úkimettiń, Quryltaıdyń, ortalyq jáne jergilikti atqarýshy organdardyń úılesimdi jumysyn kúsheıtý qajettigin jetkizdi.
— Joldaýda elimizdiń damýy úshin mańyzdy eki basty baǵyt qarastyryldy: «Halyqtyq qurylys» jáne halyqtyq tsıfrlyq ekonomıka. Birinshisi áleýmettik, kólik, energetıka jáne kommýnaldyq ınfraqurylymdy jańartýdy kózdeıdi. Ekinshisi zamanaýı tehnologııalardy kásipkerlikti damytýdyń, eńbek ónimdiligin arttyrýdyń jáne tabys tabý múmkindikterin keńeıtýdiń quralyna aınaldyrýǵa arnalǵan. Osy rette búgingi kezdesýlerge qatysýshylar tarapynan ózekti suraqtar qoıyldy. Damýdyń jańa kezeńi memlekettik sheshimderdiń sapasy men olardy oryndaý úshin jaýapkershilikti arttyrýdy talap etedi. Bul — barshamyzǵa ortaq jaýapkershilik, — dedi T. Zeınulqabden.
Spıkerler Memleket basshysy aıtqandaı, Qazaqstannyń jańa tarıhı kezeńde turǵanyn taǵy da atap ótti. Osy rette Jalpyhalyqtyq qurylys jylynyń mańyzy — aýyl men qala ınfraqurylymynyń arasyndaǵy alshaqtyqty joıýda. Sondaı-aq olar ulttyń sapasyn kóterý, sanany jańǵyrtý, mádenıettilik, ádeptilik jaıyn da qozǵady. Sonyń aıasynda elimizde «Kitap oqıtyn ult» jobasy jappaı qarqyn alyp jatqanyn tilge tıek etti.
— Ulttyq jáne álem ádebıetiniń oqyrmandary kóbeıdi. Bul qalamgerlerdiń de jaýapkershiligin kúsheıtti. Sebebi keshegi aýyl oqyrmandary búginde qalalyqtarǵa aınaldy. Qoǵamdaǵy izettilik, ádep, adaldyq, eńbek adamy taqyryptary da — ózekti másele. Joldaýda ár sala boıynsha tapsyrmalar berildi. Ásirese, qurylys salasynda osyǵan deıin turǵyn úılerdiń, salynǵan emhanalardyń, mádenı oryndardyń syn kótermegeni belgili. Endi osyǵan halyqtyq baqylaý, ıaǵnı Qazaqstan Halyq keńesi tarapynan qatań qadaǵalaý bolady. Halyq keńesi Astana Hub-pen birge úlken monıtorıng júrgizedi. Osylaısha buǵan deıingi keleńsizdikter joıylyp, halyqqa tıimdi, el múddesine saı keletin sharýalar kóbeıedi dep senemiz, — dedi R. Muqanova.
Ekonomıkalyq damý konstıtýtsııalyq qundylyqtardy, qoǵamdyq kelisimdi jáne jeke jaýapkershilikti nyǵaıtýmen qatar júrýi tıis. Zańdy qurmetteý, adal eńbek, ádildik jáne jasampaz patrıotızm odan arǵy ózgeristerdiń qoǵamdyq negizin qalyptastyrady.
Tsıfrly ekonomıka taqyrybynda sóz sóılegen A. Ámrın strategııalyq maqsat — ekonomıkasy turaqty jáne ómir súrý sapasy joǵary deńgeıdegi Ádiletti, Kúshti, Taza, Ozyq Qazaqstandy qurý ekenin jetkizdi. Kezdesýlerde eń kóp suraq osy spıkerge kásipkerlik, ekonomıka taqyrybynda qoıyldy.
Buǵan deıin reseılik sarapshy Toqaev Joldaýynyń basty ekonomıkalyq baǵdarlaryn atady.
