Qurylys salasyndaǵy barlyq qyzmet «bir tereze» qaǵıdaty boıynsha atqarylady
ASTANA. KAZINFORM – Búgin Májilistiń jalpy otyrysynda Qurylys kodeksiniń jobasyn birinshi oqylymda talqylaý kezinde QR Ónerkásip jáne qurylys mınıstri Ersaıyn Naǵaspaev qurylys salasyndaǵy memlekettik baqylaýǵa túsinik berdi.
- Sońǵy jyldary «Doing Business» kórsetkishin jaqsartýǵa baǵyttalǵan sharalardyń saldarynan sáýlet pen qurylys salalaryndaǵy memlekettik baqylaý deńgeıi tómendedi. Búginde qurylys normalaryn saqtaý mindeti tikeleı sala qatysýshylarynyń ózderine júktelgen. Nátıjesinde, qurylysqa tolyqqandy baqylaý men qadaǵalaý júrgizilmeıdi. Osyǵan baılanysty, jańa Qurylys kodeksi aıasynda baqylaý men qadaǵalaýdy kúsheıtýge baǵyttalǵan jańa tásilder ázirlendi. Mysaly, byltyrdan bastap «jedel áreket etýdiń» jańa tetigi engizildi. Qadaǵalaýdyń jańa farmaty zań buzylǵan jaǵdaıda, jedel shara qoldanýdy kózdeıdi. Qajet bolǵan jaǵdaıda qurylys jumystary toqtatylyp, lıtsenzııa men ózge de ruqsat qujattaryn qaıtaryp alý múmkindigi qarastyrylǵan. Qurylys sapasyn qatań qadaǵalaý úshin baqylaý organdarynyń qatysýymen qurylys barysy «josparly ınspektsııalaý» arqyly basynan bastap, paıdalanýǵa berilgenge deıin tekseriletin boldy, - dedi Ersaıyn Naǵaspaev.
Onyń aıtýynsha, endi profılaktıkalyq baqylaý qashyqtan, ıaǵnı obektige barmaı-aq júrgiziletin bolady. Bul úshin memlekettik organdardyń derekteri men aqparattyq júıeler paıdalanylady, qajet bolǵan jaǵdaıda dereý shara qabyldanady. Sonymen qatar, ákimdikterdiń jumysyna da baqylaý artyp, zań buzýdy aldyn alý sharalary kúsheıtiledi.
- Qurylys kodeksi jobasynda nysandy qabyldaý kezinde memlekettik sáýlet-qurylys baqylaý men tótenshe jaǵdaı organdarynyń mindetti túrde qatysýy qarastyrylǵan. Olar nysannyń paıdalanýǵa daıyn ekendigi týraly qorytyndy beredi. Jańa zańnamalyq ózgerister qurylys tsıkliniń basynan aıaǵyna deıin memlekettik baqylaýdy kúsheıtýdi kózdep otyr, - dedi mınıstr.
Atap aıtqanda, jyl basynda ótken Úkimettiń keńeıtilgen otyrysynda Prezıdent Qasym-Jomart Toqaev qurylys salasyna baǵyttalǵan birqatar mindetterdi oryndaýdy tapsyrdy. Sol mindetterdiń biri – jyl sońyna deıin qurylys salasyndaǵy barlyq protsesterdi tolyq tsıfrlandyrýdy qamtamasyz etetin Biryńǵaı aqparattyq júıe ázirleý. Qazirgi kezde salada birneshe aqparattyq júıe jumys isteıdi. Osyǵan baılanysty Kodeks jobasynda salany tsıfrlandyrýǵa aıryqsha nazar aýdarylyp, jeke baǵyt retinde qarastyryldy.
Kodekste Memlekettik aqparattyq modelder banki fýnktsıonalyn keńeıtý negizinde Biryńǵaı qurylys portalyn qurý kózdelgen, ıaǵnı qurylys salasyndaǵy barlyq qyzmetter «bir tereze» qaǵıdaty boıynsha kórsetiletin bolady.
- Portalda barlyq derbes júıelerge siltemeler bolady, jáne jumysty yńǵaıly etý úshin EGOV júıesi arqyly biryńǵaı avtorızatsııa engiziledi. Sonyń arqasynda qoldanýshylarǵa derekterdi bir ret engizý jetkilikti, ár júıege bólek kirýdiń qajeti bolmaıdy. Derbes júıeler arasynda aqparat almasý úshin biryńǵaı ıdentıfıkator, ıaǵnı nysannyń jeke sáıkestendirý nómiri qoldanylady. Ol nysanǵa alǵashqy ruqsat berilgen sátte bekitiledi. Osylaısha, portalda qurylys nysanynyń barlyq kezeńi qamtylyp, basty nazar qurylys jumystarynyń ashyqtyǵy men sapasyna aýdarylady. Sonymen qatar, portalda sala mamandaryn testileý, sertıfıkattaý jáne olardyń reestri avtomatty túrde júrgiziledi, - dedi vedomstvo basshysy.
Budan buryn habarlanǵandaı, qurylys salasyndaǵy jalǵan kompanııalardy anyqtaýdyń tetigi iske qosylady.