Qurylys salasyndaǵy alaıaqtyq: Almatyda 70 mlrd teńgege jalǵan kelisimshart jasalǵan
ASTANA. KAZINFORM — Memlekettik tapsyrysty aldaý arqyly ıelengender 664 mln teńge paıda tapqan, dep habarlaıdy QMA baspasóz qyzmeti.
QMA Almaty qalasy boıynsha departamenti qurylys salasyndaǵy memlekettik satyp alýlarǵa qatysý barysynda jalǵan málimetterdi qoldanǵan adamdar tobyna qatysty sotqa deıingi tergep-tekserý jumystaryn júrgizip jatyr.
Tergeý barysynda 2021 jyldan 2024 jylǵa deıin qylmystyq shemaǵa qatysýshylardyń jalǵan kompanııalar arqyly qurylys jumystaryn júrgizýge arnalǵan tenderlerde reıtıngterin kóterý maqsatynda qoldan jasalǵan qujattar men jalǵan málimetterdi paıdalanǵany anyqtaldy.
— Mundaı qyzmet úshin uıymdastyrýshylar 500 myńnan 1,5 mln teńgege deıin syıaqy alyp otyrǵan. Zańsyz jolmen alynǵan jalpy tabys 664 mln teńgeden asyp ketken. Bul qarajatqa 11 avtokólik pen 12 jyljymaıtyn múlik (5 turǵyn úı men 7 jer ýchaskesi) satyp alynǵan. Tergeý boljamy boıynsha, zańsyz áreketterdiń nátıjesinde birqatar uıymmen jalpy somasy 70 mlrd teńgege jýyq kelisimsharttar jasalǵan. Tórt kúdikti ustalyp, tergeý ızolıatoryna qamaldy. Tergeý amaldary jalǵasyp jatyr, — delingen QMA taratqan aqparatta.
Buǵan deıin Qarjylyq monıtorıng agenttigi tergeý departamenti basshysynyń orynbasary Keńesary Baǵbanuly qazaqstandyq jýrnalıst ári bloger Ashat Nııazovtyń Dala kompanııasynan qansha qarajat alǵanyn aıtty.