Qurylys salasynda baǵa belgileýdiń ashyqtyǵy qamtamasyz etildi
ASTANA. KAZINFORM – Joǵary aýdıtorlyq palata júrgizgen aýdıt qorytyndysy boıynsha qurylysta baǵa belgileý júıesin jetildirý, normatıvtik bazany jańartý jáne bıýdjet shyǵystarynyń tıimdiligin arttyrý sharalary qabyldandy, dep habarlaıdy palatanyń baspasóz qyzmeti.
Ónerkásip jáne qurylys mınıstrligi men Qarjy mınıstrliginiń birlesken buıryǵy negizinde qurylys resýrstary baǵalarynyń anyqtyǵyn qamtamasyz etý tártibi bekitildi. Endi ýákiletti organ ishki naryqqa taýar jetkizýshilerdiń derekterin jáne elektrondyq shot-faktýralar málimetterin turaqty túrde alyp otyrady.
2026 jylǵy 1 shildeden bastap qurylys materıaldary men jabdyqtaryn óndiretin jáne jetkizetin kásipkerlerdiń tizbesin júrgizý qaǵıdalary kúshine enedi. Mundaı sýbektiler baǵa monıtorıngi úshin qajetti aqparatty tikeleı vedomstvoǵa usynýǵa mindetteldi.
Sonymen qatar Qurylys jobalarynyń memlekettik bankindegi avtorlyq quqyq máselesi retteldi. «Memsaraptama» RMK 921 joba boıynsha keńes ótkizip, 917 avtorlyq shartqa qol qoıdy.
2026 jylǵy 1 shildeden bastap Qurylys kodeksine engizilgen túzetýlerge sáıkes, memlekettik ınvestıtsııalar esebinen jasalǵan jobalarǵa múliktik quqyqtar avtomatty túrde ýákiletti organ men memlekettik saraptama uıymyna ótedi. Bul daıyn qujattamany qaıta qoldanýǵa, jobalaý merzimi men qunyn qysqartýǵa jaǵdaı jasaıdy.
Salanyń normatıvtik-tehnıkalyq bazasy da qaıta qaraldy. Analız nátıjesinde 20 jyldan astam ýaqyt buryn ázirlengen 455 qujattyń ishinen 386 eskirgen qujat alyp tastaldy, al 69-y qoldanystaǵy norma retinde saqtaldy.
Osyǵan deıin aýdıtorlyq palata talaptaryn oryndamaǵan 18 sheneýnik jazaǵa tartylǵan bolatyn.
