Qurylys salasyna JI tehnologııalaryn engizý jyl sońyna deıin keńeıtiledi
ASTANA. KAZINFORM – Úkimet otyrysynda Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev qurylys salasyna jasandy ıntellekt tehnologııalaryn engizý jyl sońyna deıin keńeıtiletini týraly aıtty.
– 2026 jylǵy 9 qańtarda qurylys salasyn 2026–2027 jyldarǵa tsıfrlandyrý jospary bekitildi. 2025 jyldyń sońynda Astana qalasynda qurylys barysyn baqylaý úshin kompıýterlik kórý jáne jasandy ıntellekt tehnologııalaryn engizý boıynsha pılottyq joba iske qosyldy. Jyl sońyna deıin jobany masshtabtaý josparlanýda. Júıe jer ýchaskelerin maqsatsyz paıdalanýdy jáne qala qurylysy josparlarynan aýytqýlardy erte kezeńde avtomatty túrde anyqtaýǵa múmkindik beredi. Bul preventıvti baqylaý quralyn qalyptastyryp, qurylys barysyna jedel monıtorıng júrgizýdi qamtamasyz etedi, - dedi Jaslan Mádıev.
Vıtse-mınıstrdiń aıtýynsha, qurylystaǵy biryńǵaı tsıfrlyq tásil 3 baǵytqa negizdelgen. Derekterdi ortalyqtandyrý barlyq júıelerdi birtutas tsıfrlyq ekojúıege biriktiredi. Sáıkestendirýdiń ashyqtyǵy nysandarǵa tsıfrlyq pasporttar berýdi qamtamasyz etedi. Ózara is-qımyldy avtomattandyrý adamı faktordyń áserin tómendetedi. Bul qurylys salasyn basqarý tıimdiligin arttyrady.
– Obektilerdiń ómirlik tsıkliniń barlyq kezeńinde biryńǵaı derekter negizinde tsıfrlyq basqarý modeli engizilýde. Tsıfrlyq quraldar protsesterdiń ashyqtyǵyn arttyryp, shyǵyndar men táýekelderdi azaıtady jáne aldyn ala basqarýǵa múmkindik beredi. Bul memlekettik basqarýdyń tıimdiligin arttyryp, salanyń turaqty damýyna yqpal etedi, - dedi ol.
Eske sala keteıik, buǵan deıin Memlekettik qala qurylysy kadastrynyń avtomattandyrylǵan aqparattyq júıesi engiziletini habarlanǵan edi.
