Qurylys salasy tsıfrlandyrylyp jatyr: jańa kodeks neni ózgertti
ASTANA. KAZINFORM — Qazaqstanda qurylys salasyndaǵy memlekettik qyzmetter kezeń-kezeńimen tolyq tsıfrlyq formatqa kóshirilip jatyr. Sonymen qatar 1 shildeden bastap kúshine engen jańa Qurylys kodeksi boıynsha merdigerlerdiń nysan sapasyna jaýapkershiligi kúsheıtildi.
Endi qurylys kompanııasy nysanǵa keminde bes jyl kepildik berýge mindetti. Bul týraly Jibek Joly telearnasynyń «Búgin.LIVE» baǵdarlamasynda QR Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń basqarma basshysy Rahat Eltızarov aıtty.
Onyń aıtýynsha, qurylys salasyn tsıfrlandyrý jumystary jyl basynan beri qarqyndy júrgizilip keledi.
— Memleket basshysynyń tapsyrmasyna sáıkes, Qurylys mınıstrliginiń janynda aýqymdy jumystar júrgizildi. 1 shildeden bastap jańa Qurylys kodeksi kúshine endi. Al qańtardan bastap qurylys salasyndaǵy avtomattandyrý júıeleriniń nátıjesin kórip kelemiz. Mysaly, sáýlet-josparlaý tapsyrmasy men tehnıkalyq sharttardy buryn ákimdikke baryp, qaǵaz túrinde alatyn bolsa, qazir olardy elektrondy túrde tapsyryp, belgilengen merzimde alýǵa tolyq múmkindik bar, — dedi Rahat Eltızarov.
Mamannyń aıtýynsha, tsıfrlandyrý tek qujat rásimdeýmen shektelmeıdi. Qurylys nysanynyń salyný barysyn da tsıfrlyq júıe arqyly baqylaý múmkindigi jasalyp jatyr.
— Qazir qurylystyń barysy, onyń qalaı júrgizilip jatqany tsıfrlandyrylyp jatyr. Mysaly, Astana qalasynda salynyp jatqan úılerdiń barlyǵynda qurylys barysy beınekameralar arqyly júıeli túrde baqylanady. Qaı qabatqa deıin jetkeni, jumystardyń qaı baǵytta júrip jatqanynyń barlyǵy tsıfrlyq formatta kórinedi, — dedi ol.
Ár qurylys nysanyna biregeı nómir beriledi
Rahat Eltızarovtyń aıtýynsha, 1 qańtardan bastap jumys isteı bastaǵan Q portaly qurylys nysandaryn baqylaýdy bir júıege biriktirdi.
— Tehnıkalyq sharttardy alǵan kezde nysanǵa biregeı nómir bekitiledi. Sol nómirdi Q portalǵa engizse, turǵyndar qurylys nysanynyń qalaı júrip jatqanyn, qandaı kezeńde turǵanyn baqylaýǵa bolady, — dedi basqarma basshysy.
Onyń sózinshe, bul júıelerdiń engizilýi qurylys salasyndaǵy qaǵazbastylyqty azaıtyp qana qoımaı, sybaılas jemqorlyq táýekelderiniń aldyn alýǵa da bolady.
— Buǵan deıin azamattar tıisti qujattardy alý úshin quzyrly organdarǵa baryp, qaǵaz túrinde tapsyratyn. Qazir elektrondy túrde ótinish berip, belgilengen merzimde qujattaryn ala alady. Árkimmen jeke kelisip otyrýdyń qajeti joq, — dedi ol.
Maman tsıfrlandyrý jumystary Úkimettiń tapsyrmasyna sáıkes 2029 jylǵa deıin jalǵasatynyn atap ótti.
Merdigerdiń kepildigi 5 jylǵa uzartyldy
Jańa Qurylys kodeksindegi mańyzdy ózgeristerdiń biri — turǵyn úıdiń sapasyna merdigerdiń jaýapkershiligin kúsheıtý.
— Qarapaıym turǵyndardyń jıi qoıatyn suraqtarynyń biri — salynǵan úıdiń sapasyna qatysty. Úıdiń sapasy durys bolmasa nemese merdiger kompanııa jumysty ýaqytynda aıaqtamasa, kim jaýap beredi degen másele bar. Osyǵan baılanysty jańa kodekste tıisti normalar engizildi, — dedi Rahat Eltızarov.
Onyń aıtýynsha, buǵan deıin qurylys aıaqtalǵannan keıin merdiger kompanııanyń kepildik merzimi eki jyl bolatyn. Jańa talap boıynsha bul merzim bes jylǵa uzartyldy.
Al úıdiń negizgi konstrýktsııalaryna qoıylatyn kepildik merzimi odan da uzaq.
— Negizgi konstrýktsııalar, ıaǵnı shatyr, úıdiń qasbeti, ınjenerlik jeliler, jylý júıeleri sııaqty elementter boıynsha kepildik merzimi 10 jylǵa deıin uzartyldy. Bul endi merdiger kompanııanyń tikeleı mindeti, ıaǵnı burynǵydaı úıdi tapsyryp, eki jyldan keıin jaýapkershilikten bosaıtyn jaǵdaı bolmaıdy, — dedi ol.
Maman bul ózgeristerdiń turǵyndar úshin mańyzdy ekenin atap ótti.
— Búginde turǵyn úı naryǵynda úsh másele mańyzdy. Birinshisi — qurylystyń sapaly bolýy, ekinshisi — merdigerlerdiń jaýapkershiligi, úshinshisi — úıdi alǵannan keıin turǵyndardyń óz talaptaryn qoıa alýy, — dedi basqarma basshysy.
Qurylys nysandaryn memlekettik baqylaý kúsheıedi
Jańa kodekspen qurylys sapasy men qaýipsizdigin baqylaý tetikteri de kúsheıtildi.
Rahat Eltızarovtyń aıtýynsha, qurylys nysandaryn baqylaýǵa jaýapty memlekettik organdardyń jumysy da qaıta qaralǵan. Buǵan qurylys sapasyn baqylaý jáne órt qaýipsizdigi baǵytyndaǵy baqylaý tetikteri kiredi. Sonymen qatar josparly ınspektsııalaý júıesi de engizilip jatyr.
— Josparly ınspektsııalaý — qurylys sapasyn baqylaý jáne qadaǵalaý júıesi, ıaǵnı jobalaýdan bastap qurylys aıaqtalǵanǵa deıingi jumystarǵa tolyqqandy baqylaý júrgiziledi. Memleket te bızneske kedergi jasamaýy kerek, bıznes te memleketke qaýip tóndirmeýi kerek, — dedi ol.
Aıta keteıik, buǵan deıin, qurylys salasynda baǵa belgileýdiń ashyqtyǵy qamtamasyz etiletinin jazǵan edik.
