Qurylys salasy ınjenerlerin sertıfıkattaý engizilmek
ASTANA. KAZINORM – Elimizde qurylys salasy ınjenerlerin sertıfıkattaý engizilmek. Bul týraly búgin Májiliste jańa Qurylys kodeksin talqylaýǵa arnalǵan sarapshylyq kezdesýde Ónerkásip jáne qurylys vıtse-mınıstri Tımýr Qaraǵoıshın aıtty.
«Kodeks jobasynda jobalaý aldyndaǵy daıyndyqtan bastap, ony paıdalanýǵa deıin qurylystaǵy qyzmettiń barlyq salasyn qozǵaıtyn derbes baǵyttarǵa aınalǵan tsıfrlandyrý máselesine erekshe nazar aýdaryldy. E-Qurylys aqparattyq júıesiniń alańynda qurylys obektisiniń ómirlik tsıkliniń barlyq kezeńderi qarastyrylady. Onyń negizgi baǵyty qurylys kezeńinde jasalady. Sonymen qatar, dál osy alańda testileý rásimi júrgiziledi — qurylys salasynyń mamandaryn sertıfıkattaý jáne tizimdi avtomatty túrde júrgizý. Sondaı-aq, tsıfrlandyrý jónindegi jumystar aıasynda jobalaý jónindegi jumystardyń sapa deńgeıin arttyrýdy qamtamasyz etýge tıis qurylys obektilerin aqparattyq modeldeý mindeti zańnamalyq túrde bekitiledi», — dedi vıtse-mınıstr.
Onyń aıtýynsha, sarapshylardy jáne ınjenerlik-tehnıkalyq qyzmetkerlerdi attestattaýdyń qoldanystaǵy júıesi attestattaýdan ótken sarapshylardyń biliktilik dárejesin jetkilikti túrde tıimdi kórsetpeıdi.
«Halyqaralyq tájirıbeni zerdeleý aıasynda ulttyq zańnamanyń erekshelikterin eskere otyryp, Eýroodaqtyń tabysty praktıkasyna uqsas qurylys salasynyń ınjenerlerin sertıfıkattaýdy engizý josparlanýda. Sertıfıkattaýdy júrgizý jónindegi fýnktsııa básekelestik ortaǵa beriledi jáne ony naryq qatysýshylary júzege asyrady. Budan basqa, qurylys salasynda óreskel zań buzýshylyqtarǵa jol berilgen jaǵdaıda qyzmetti júzege asyrýǵa tyıym salý múmkindigimen qurylys naryǵyna qatysýshylardyń ortaq jaýapkershiligin belgileý josparlanyp otyr», — dedi Tımýr Qaraǵoıshın.
