Qurylys obektisi áýelgi jobasynan aýytqymaýy úshin biregeı nómir engiziledi
ASTANA. KAZINFORM – Budan bylaı qalalarda salynyp jatqan nysannyń áýelgi jobasynan jáne salyný maqsatynan aýytqymaýy úshin qurylys obektisiniń biregeı nómiri engiziledi. Bul týraly Ónerkásip jáne qurylys vıtse-mınıstri Qýandyq Qajkenov aıtty.
– Qala qurylysy qyzmetiniń ashyqtyǵyn, sondaı-aq qala jobalaryn ázirleý men ony iske asyrýda sáıkestikti qamtamasyz etý úshin mınıstrlik qurylys obektisiniń biregeı nómirin engizý boıynsha jumystardy atqardy. Bul qurylys bastalǵannan bastap paıdalanýǵa berilgenge deıingi qujattardyń nysanaly maqsatqa sáıkestigin tekserýge múmkindik beredi, - dedi ol Úkimet otyrysynda.
Sondaı-aq vıtse-mınıstr núkteli qurylysqa jol bermeý úshin 2024 jylǵy qańtar aıynan bastap biryńǵaı qala qurylysy saraptamasy iske qosylǵanyn atap ótti.
— Jańa mehanızm qurylysty josparlaý kezeńinde normalarynan aýytqýdy, sondaı-aq egjeı-tegjeıli josparlaý jobasynyń bas josparǵa sáıkes kelýin qadaǵalaýǵa múmkindik beredi. Tıisti saraptamadan ótkennen keıin qala qurylysy jobasynyń etalondyq nusqasy qala qurylysynyń kadastrlyq júıesine túsedi. Osylaısha josparlaýdyń ashyqtyǵy qamtamasyz etiledi, - dep túıdi sózin Qýandyq Qajkenov.
Aıta keteıik, Prezıdent Almaty oblysynyń ákimine joldardyń qurylysyna basa mán berýdi tapsyrdy.