Qurylys nysanyna qujat berý: 89 qalada tsıfrlyq júıe iske qosyldy

ASTANA. KAZINFORM – Elimizdiń 89 qalasynda bastapqy ruqsat qujattaryn, tehnıkalyq sharttardy berý tsıfrlyq júıe arqyly iske asyrylyp jatyr. Bul týraly Ónerkásip jáne qurylys vıtse-mınıstri Qýandyq Qajkenov aıtty.

– Ótken jyldyń qarasha aıynda 89 qalada bastapqy ruqsat qujattaryn berý, eskızdik jobalardy kelisý jáne tehnıkalyq sharttardy berý boıynsha pılottyq joba iske qosyldy. Búgingi tańda osy qyzmetter qala kadastry júıesi arqyly shtattyq rejımde kórsetilip jatyr. Pılottyq joba iske qosylǵannan bastap túsken ótinishterdiń 91%-yna júıe arqyly qyzmet kórsetildi, - dedi ol Úkimet otyrysynda.

Vıtse-mınıstr keıbir jaǵdaıda atalǵan tsıfrlyq qyzmetti alý múmkin emesin atap ótti.

— Jer ýchaskesi bas jospardyń shekarasynan tys jerde ornalasqan jaǵdaıda júıe arqyly ótinish berý múmkin emes. Sondaı-aq, qala jobasynda kórsetilgen nysanaly maqsatqa sáıkes kelmegen jaǵdaıda ótinish berýshige júıe arqyly qyzmet kórsetilmeıdi. Bul rette, tsıfrlyq quraldar egjeı-tegjeıli josparlaý jobasynyń bas josparǵa sáıkes emestigin anyqtaýǵa múmkindik beredi. Ákimdiktermen bekitilgen is-sharalar jospary oryndalǵannan keıin kórsetilgen memlekettik qyzmetterdi tolyqtaı tsıfrlyq formatqa kóshirýge bolady, - dep túıdi sózin Qýandyq Qajkenov.

Aıta keteıik, qurylys obektisi áýelgi jobasynan aýytqymaýy úshin biregeı nómir engiziledi.