Qurylys nysandarynda eńbek qaýipsizdigine baqylaý kúsheıedi
ASTANA. KAZINFORM — Eńbek jáne halyqty áleýmettik qorǵaý mınıstrliginde qurylys salasyndaǵy eńbek qaýipsizdigi men eńbekti qorǵaý máselelerine arnalǵan keńes ótti. Jıynǵa memlekettik organdardyń, kásipodaq ortalyǵynyń ókilderi jáne elordanyń iri qurylys kompanııalary qatysty.
QR Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev qurylys nysandarynda eńbek qaýipsizdigi talaptaryna formaldy qaraý men negizgi normalardy elemeý qazirgi memlekettik saıasat qaǵıdattaryna múlde qaıshy ekenin atap ótti.
Ol búginde salada jumys qarqyny kúsheıip, qurylys maýsymy qyzǵan kezeń bastalǵanyn aıtyp, árbir nysanda qaýipsizdik talaptarynyń saqtalýyna kúsheıtilgen ári jeke baqylaý qajet ekenin jetkizdi.
Ótken jyldyń jeltoqsan aıynda Memleket basshysy elordadaǵy qurylys salasynda óndiristik jaraqattaný deńgeıiniń ósýine erekshe nazar aýdaryp, jumysshylardyń qaýipsizdigin qamtamasyz etý boıynsha naqty ári nátıjeli sharalar qabyldaýdy tapsyrǵany aıtyldy.
Memlekettik saıasattyń negizinde 2026 jylǵy 15 naýryzda respýblıkalyq referendýmda qabyldanǵan jańa Konstıtýtsııanyń 1-babynda bekitilgen qaǵıdat jatqandyǵy atap ótildi. Atalǵan normaǵa sáıkes memlekettiń eń qymbat qazynasy – adam, onyń ómiri, quqyqtary men bostandyqtary.
— Árbir jumys berýshi mynany naqty túsinýi tıis: jumysshylardyń qaýipsizdigine únemdeýge bolmaıdy. Kaskanyń, qaýipsizdik belbeýiniń, nusqamanyń nemese eńbek shartynyń bolmaýy – jaı formaldylyq emes, adam ómirine tónetin tikeleı qaýip ári qatań jaýapkershilikke negiz. Árbir statıstıkanyń artynda adam taǵdyry, otbasynyń qaıǵysy men orny tolmas shyǵyn tur. Qaýipsizdik eskerilmegen jerde aqtalýǵa negiz joq, – dedi Erbol Tuıaqbaev.
Keńes barysynda eńbek zańnamasyn qatań saqtaý, eńbek qatynastaryn azamattyq-quqyqtyq sharttarmen almastyrýǵa jol bermeý, qyzmetkerlerdi mindetti saqtandyrý, sheteldik jumys kúshin zańdy tartý máseleleri keńinen talqylandy. Sondaı-aq bas merdigerlerdiń qosalqy merdiger uıymdarǵa baqylaýyn kúsheıtý qajettigine erekshe nazar aýdaryldy.
— Budan bólek, jumys berýshilerdiń Eńbek sharttaryn esepke alýdyń biryńǵaı júıesine (EShEBJ) málimetterdi ýaqtyly engizýi mindetti ekeni eskertildi. Bul talapty buzǵany úshin ákimshilik jaýapkershilik qarastyrylǵan, — delingen habarlamada.
Mınıstrlikte óndiristik jaraqattanýdyń barlyq jaǵdaıy memlekettiń erekshe baqylaýynda ekeni aıtyldy. Al eńbek qaýipsizdigi talaptaryn buzǵany úshin saldaryna qaraı ákimshilik jáne qylmystyq jaýapkershilik kózdelgen.
Sonymen qatar júıeli zańbuzýshylyqtar anyqtalǵan jaǵdaıda sheteldik jumys kúshin tartýǵa berilgen ruqsattardy keri qaıtaryp alý, sondaı-aq qurylys qyzmetine berilgen lıtsenzııalardyń kúshin toqtatý nemese qaıtaryp alý máseleleri qaralatyny atap ótildi.
Jıyn qorytyndysy boıynsha Memlekettik eńbek ınspektsııasy komıteti men aýmaqtyq departamentterge qurylys nysandaryndaǵy baqylaýdy kúsheıtý, profılaktıkalyq jumystardy jandandyrý jáne turaqty kóshpeli monıtorıngter uıymdastyrý tapsyryldy.
Elorda qarqyndy damyp jatqan kezeńde qurylys salasy qaýipsizdik máselesine formaldy túrde qaraýǵa jol bere almaıdy. Sebebi árbir zańbuzýshylyqtyń artynda adam ómiri tur jáne jumys berýshiniń shynaıy jaýapkershiligi dál osy ólshemmen baǵalanady.
Keńeske BI Group, Bazis-A, Damu Development, Qazaq Stroy, Sensata Construction, NAK, Tumar Group, Orda Construction sekildi elordanyń iri qurylys kompanııalarynyń ókilderi qatysty.
