Qurylys mınıstri jańa kodeks jobasyn ázirleýge jumsalǵan qarajatqa qatysty túsinik berdi
ASTANA. KAZINFORM – QR Ónerkásip jáne qurylys mınıstri Ersaıyn Naǵaspaev jańa Qurylys kodeksiniń jobasyn ázirleýge jumsalǵan qarajatqa qatysty túsinik berdi.
- Jalpy, kodeks jobasyn ázirleýge 363 mln teńge bólindi. Osyǵan qatysty tekseris te bolǵan edi. Atap aıtqanda, birneshe jyl buryn osy qujat jobasyn ázirleýge konkýrs jarııalaý josparlanǵan. Bul turǵyda Ádilet mınıstrliginiń enshiles uıymdarynan, «Atameken» palatasy jaǵynan, sondaı-aq jeke kompanııalar men QazQSǴZI tarapynan usynys boldy. Birinshi kezeńde usynystardyń barlyǵy 1 mlrd teńge shamasynda belgilendi. Degenmen, bizdegi vedomstvoǵa baǵynyshty uıym eń tómengi baǵany usyndy. Osydan keıin memlekettik tapsyrys aıasynda tıisti rásimder uıymdastyrylyp, atalǵan soma 363 mln teńgege deıin tómendedi, - dedi E. Naǵaspaev Parlament Májilisinde tilshiler suraǵyna jaýap bere otyryp.
Osy oraıda ol depýtattyq korpýstyń narazylyǵynan keıin tıisti tekserý bolǵanyn aıtty.
- Qarjy mınıstrliginiń Іshki memlekettik aýdıt komıteti tekserýdi ótkizdi. Jalpy, qarjy baǵytynda talaptardy buzý jaǵdaıy anyqtalmady. Biraq, tehnıkalyq sıpattaǵy qatelik oryn alǵan. Bul máselege qatysty mınıstrliktiń jaýapty qyzmetkeri jazalandy, - dedi mınıstr.
Budan buryn habarlanǵandaı, búgin Parlament Májilisiniń jalpy otyrysynda Qurylys kodeksiniń jobasy men ilespe qujat birinshi oqylymda maquldandy.
Eske salsaq, byltyr Májilis depýtaty Baqytjan Bazarbek Ónerkásip jáne qurylys mınıstrligi Qurylys kodeksiniń jobasyn ázirleý kezinde búrkemelengen zań buzý faktisine jol bergenin aıtqan edi.
Sonymen qatar Premer-mınıstr Oljas Bektenov depýtat B. Bazarbektiń Qurylys kodeksiniń jobasyn ázirleý kezinde zańsyzdyqtarǵa jol berilgeni týraly saýalyna jaýap berdi.