Qurylys kompanııasynyń basshysy Móldir Súıinshálıge qatysty qylmystyq is qozǵaldy
ASTANA. KAZINFORM — QMA Astana qalasy boıynsha departamenti asa iri kólemdegi alaıaqtyq faktisi boıynsha birneshe qurylys kompanııasynyń basshysy Móldir Súıinshálıge qatysty tergep-tekserý júrgizip jatyr.
— Tergeý amaldaryna saı, 2021–2024 jyldar aralyǵynda Móldir Súıinshálı «Nura Elite» kottedj qalashyǵyn salý syltaýymen azamattardan qarajat tartqan. Joba aıasynda 37 kottedj jáne 24 taýnhaýs salý kózdelgen. Alaıda búgingi kúni taýnhaýstar tolyq aıaqtalmaǵan (tek qańqalary ǵana tur), 2023 jyldyń 4-toqsanyna deıin aıaqtaý jónindegi mindettemeler oryndalmaǵan. Satyp alýshylarmen aldyn alasatyp alý-satý sharttary jasalǵan. Saldarynan 56 adam jábirlenýshi retinde tanylyp, tartylǵan qarajattyń jalpy somasy 3,9 mlrd teńge bolǵan. Onyń ishinde 322 mln teńge Móldir Súıinshálı, jubaıynyń jáne anasynyń esepshottaryna aýdarylǵan, sondaı-aq 145 mln teńge qolma-qol aqshaǵa aınaldyrylǵan, — delingen QMA habarlamasynda.
Sondaı-aq bir jyljymaıtyn múlikti birneshe ret satý faktisi anyqtalǵan.
Máselen, jábirlenýshi tolyq tólegen kottedjdiń biri kúdikti tarapynan jeke mindettemeleri boıynsha kepilge qoıylyp, keıin úshinshi tulǵalardyń atyna rásimdelip, birneshe ret qaıta satylǵan.
Móldir Súıinshálı satypalýshylarmen is júzinde jer ýchaskelerine quqyq berýdi kózdeıtin sharttar jasasqan, alaıda olardy ıelikten shyǵarýǵa zańdy quqyǵy bolmaǵan.
Úleskerlerdiń qarajatynyń bir bóligi Astana qalasynda «Asylhan» turǵyn úı keshenin salýǵa arnalǵan jertelimin satyp alýǵa jumsalǵan.
Sonymen qatar, qurylysqa qajetti ruqsat qujattary bolmaǵanyna qaramastan, ol Perızat Qaırattyń «Biz birgemiz» qaıyrymdylyq qory arqyly buqaralyq aqparat quraldarynda muqtaj áıelge páter beriletini týraly málimdegen. Alaıda is júzinde turǵyn úı kesheniniń qurylysy bastalmaǵan.
Sottyń sanktsııasymen oǵan úı qamaq túrindegi bultartpaý sharasy qoldanyldy.
Tergeý jalǵasyp jatyr.
Qylmystyq-protsestik kodeksiniń 201-babyna sáıkes ózge aqparat jarııalaýǵa jatpaıdy.
Aıta ketelik Jetisýda úlesker qarjysyn zańsyz tartqan qurylysshylar jaýapqa tartylǵan edi.
