Qurylys kompanııalarynyń jaýapkershiligin kúsheıtý qajet —Prezıdent
ASTANA. KAZINFORM — Memleket basshysy sapasyz materıaldardy paıdalaný, qurylysqa qatysty erejelerdi jáne qaýipsizdik talaptaryn saqtamaý — naǵyz qylmys ekenin aıtty.
— Turǵyn úıler sapaly salynýy qajet. Astana — qurylys qarqyny boıynsha elimizde kósh bastap tur. Jyl basynan beri qalada 5 mıllıon sharshy metr úı salynǵan. Bul — búkil elde qoldanysqa berilgen turǵyn úılerdiń tórtten biri degen sóz. Árıne, jaqsy kórsetkish. Biraq sandy kóbeıtemiz dep, sapany umytyp ketetinder bar. Mysaly, taıaýda turǵyn úıdiń syrtqy qaptamasy opyrylyp tústi. Taǵy bir úıde lıft qulady. Eki jaǵdaı da qaıǵyly oqıǵaǵa ákep soqtyrdy. Sapasyz materıaldardy paıdalaný, qurylysqa qatysty erejelerdi jáne qaýipsizdik talaptaryn saqtamaý — naǵyz qylmys. Muny ashyq aıtýymyz kerek. Buǵan múldem jol berýge bolmaıdy, — dedi Prezıdent.
Úkimet qurylystyń barlyq kezeńin, ıaǵnı jobalaýdan bastap daıyn úıdi tapsyrýǵa deıingi úderisti tolyq tsıfrlandyrýǵa tıis. Sol arqyly bul salada tártip ornatyp, jumystyń sapasyn qamtamasyz etýi qajet.
— Aımaq ákimderi eldi mekenderdiń tsıfrlyq kóshirmesin jasap, barlyq nysannyń jaı-kúıin únemi baqylaýda ustaýy kerek. Qurylys kompanııalarynyń jaýapkershiligin kúsheıtý qajet. Úı salyp jatqan kompanııalar men merdigerler týraly jáne saraptama nátıjeleri jaıly aqparat ashyq ári qoljetimdi bolýǵa tıis, — dedi ol.
Memleket basshysy óndiristegi qaýipsizdikti kúsheıtý úshin naqty sharalar qabyldaýdy tapsyrdy
— Taǵy bir másele: elordada jumysta júrip jaraqat alý derekteri kóbeıip barady. Jyl basynan beri qaladaǵy óndiris oryndarynda 32 adam zardap shegip, 12 adam qaza tapqan. Ákimdik Eńbek jáne halyqty áleýmettik qorǵaý mınıstrligimen birlesip, óndiristegi qaýipsizdikti kúsheıtý úshin naqty sharalar qabyldaýǵa tıis. Jumys ornynda bolýy múmkin qaýip-qaterlerdi saralap, oqys oqıǵalardyń aldyn alý qajet. Ár qaıǵyly oqıǵanyń sebep-saldaryn muqııat zerdelep, tıisti qorytyndy jasaǵan jón, — dedi Prezıdent.
Aıta ketelik Prezıdent LRT jelisin uzartý jáne Qabanbaı batyr dańǵylynda eki deńgeıli jol salý usynysyn qoldaǵan edi.