Qurylys kompanııalaryna kepildik alý talaptary jeńildeıdi — zań jobasy

ASTANA. KAZINFORM — Qurylys kompanııalaryn qarajatty zańdy jolmen tartýǵa yntalandyrý maqsatynda jańa zań jobasynda biryńǵaı operatordyń kepildigin alý tásili boıynsha bastapqy talaptardy jeńildetý qarastyrylǵan.

Bul týraly Ónerkásip jáne qurylys mınıstrligi qala qurylysy jáne turǵyn úı-kommýnaldyq saıasat departamentiniń qurylys salasyn damytý basqarmasynyń basshysy Erlan Kúlishev aıtyp berdi. 

— Qurylys kompanııalary biryńǵaı operatordyń kepildigi, ekinshi deńgeıdegi bankterdiń jobalarǵa qatysýy jáne kóppáterli turǵyn úıdiń qańqasy turǵyzylǵannan keıin qarajat tartý. Biryńǵaı operatordyń kepili boıynsha 255 kepildik berilgen, bul naryqtyń 25,5%-yn quraıdy. Sonyń ishinde 221 joba aıaqtaldy, 34 joba salynyp jatyr. Ekinshi deńgeıli bankterdiń qatysýy arqyly 588 nysanǵa úleskerlerdiń qarajatyn tartýǵa ruqsat berilgen, bul naryqtyń 58,9%-yn quraıdy. Onyń ishinde 455 joba aıaqtalyp, 133 nysanda qurylys jumystary jalǵasýda, — dedi Erlan Kúlishev «Atameken» UKP alańynda ótken jıynda.

Onyń aıtýynsha, kóppáterli turǵyn úıdiń qańqasyn turǵyzǵannan keıin qarjy tartý tásili boıynsha jergilikti atqarýshy organdar tarapynan 156 nysanǵa ruqsat berildi. Bul naryqtyń 15,6%-yn quraıdy. Onyń ishinde 124 joba aıaqtalyp, 32-si salynyp jatyr. 

Sondaı-aq qurylys kompanııalaryn qarajatty zańdy jolmen tartýǵa yntalandyrý maqsatynda zań jobasynda biryńǵaı operatordyń kepildigin alý tásili boıynsha bastapqy talaptardy jeńildetý qarastyrylǵan. 

— Atap aıtqanda, talap 3 jyldan 2 jylǵa, qurylys kólemi respýblıkalyq mańyzy bar qalalar men elordada 18 myń sharshy metrden 10 myń sharshy metrge deıin, al óńirlerde 9 myńnan 5 myń sharshy metrge deıin tómendetiledi. Sonymen qatar, qurylys salýshy nemese ýákiletti kompanııanyń aktıvteri qysqa jáne uzaq merzimdi mindettemesin shegergennen keıingi jıyntyq aktıvteriniń keminde 10% quraýy tıis, — dep túsindirdi mınıstrlik ókili.

Búgin elordada «Atameken» ulttyq kásipkerler palatasy alańynda «Turǵyn úı qurylysyna úlestik qatysý týraly» zańy talqylandy. Jıynǵa quzyrly organdar ókilderi, qurylys kompanııalarynyń basshylary men bıznes ókilderi qatysty. 

Eske salaıyq, bıyl 30 sáýirde Májilis úlesker aqshasyna turǵyn úı salý erejesin jetildiretin zańdy qabyldady. 

12 maýsymda Senat úleskerlikti rettep, azamattyq qorǵanys júıesin nyǵaıtatyn zańdardy qarady.