Qurylys kompanııalaryna aldyn ala brondaý sharttaryn jasasýǵa tyıym salynbaq
ASTANA. KAZINFORM – Qurylys kompanııalaryna aldyn ala brondaý sharttaryn jasasýǵa tyıym salynbaq. Bul týraly Májilis depýtattarynyń saýalyna Ónerkásip jáne qurylys mınıstriniń mindetin atqarýshy Iran Sharhannyń jaýabynda aıtylǵan.
«Qazirgi ýaqytta Májiliste «Qazaqstan Respýblıkasynyń keıbir zańnamalyq aktilerine qurylys salasyn jetildirý jáne turǵyn úı qurylysyna úlestik qatysý máseleleri boıynsha ózgerister men tolyqtyrýlar engizý týraly» zań jobasy qaralýda. Osy zań jobasy aıasynda qurylys salýshylardyń zańnamany aınalyp ótýge, úleskerlerdiń qarajatyn tartýyna jol bermeý maqsatynda memlekettik retteýdi kúsheıtý boıynsha qosymsha sharalar kózdelgen», - ol.
Onyń atap ótýinshe, túzetýler mynalarǵa baǵyttalǵan:
- aldyn ala brondaý (rezervteý)sharttaryn jasasýǵa tyıym salý;
- úleskerlerdiń aqshasyn tartýǵa ruqsatsyz jarnamaǵa tyıym salý;
- «turǵyn úı qurylysyna úlestik qatysý týraly» QR Zańyn retteý salasyna «shaǵyn qabatty qurylys» uǵymyn engizý;
- qurylys merzimderin uzartýdy qysqartý (qurylys obektisiniń JSQ-da kórsetilgen merzimnen 5 aıǵa deıin barynsha uzartý);
- úlestik zańnamaǵa konsýltatsııa berý máseleleri boıynsha Úleskerlerdi qoldaý ortalyǵynyń jumys isteýin qamtamasyz etý;
- úleskerlerdiń aqshasyn tartýǵa ruqsatsyz/biryńǵaı operatordyń kepildiginsiz ıpoteka berýge tyıym salý.
«Tutastaı alǵanda, turǵyn úı qurylysyna úlestik qatysý salasynda ázirlengen tásilder men qabyldanatyn sharalar úlestik qurylys protsesteriniń zańdylyǵy men ashyqtyǵyn, qurylys naryǵyna barlyq qatysýshylarynyń teńdigin qamtamasyz etýge, memleket tarapynan baqylaýdy kúsheıtýge, úleskerlerdiń quqyqtary men zańdy múddelerin qorǵaýǵa baǵyttalǵan», - dedi Iran Sharhan.
