Qurylys kompanııasyn jarnamalaıtyn tanymal adamdardyń jaýapkershiligin arttyrý qajet – senator
ASTANA. KAZINFORM – Keıingi 3 jylda qurylys kompanııalarymen jasalǵan sharttyń oryndalmaýyna qatysty 45 qylmystyq is tirkelgen jáne 4700-den astam úlesker zardap shegip otyr. Senator Gennadıı Shıpovskıh óziniń depýtattyq saýalynda qurylys uıymdarymen jasalǵan sharttardyń oryndalmaýy men shaǵymdar týraly derekterdi keltirdi.
Depýtattyń aıtýynsha, qurylys salýshylardan zardap shekkenderdiń basym bóligi Astanada – 1 282 adam, Qaraǵandyda – 961 adam, Aqtóbede – 657, Atyraýda – 631 jáne Almatyda – 360 adam.
Senator 2019-2022 jyldar aralyǵynda elordada problemalyq obektilerdiń qurylysyn aıaqtaýǵa Ulttyq qordan 60 mlrd teńge jáne respýblıkalyq jáne jergilikti bıýdjetterden 154,6 mlrd teńge bólingenin atap ótti. Osylaısha, memlekettiń qatysýymen Astanada 120 problemalyq turǵyn úıdiń qurylysy aıaqtaldy. Alaıda búginde elimizde 7 myńǵa jýyq aldanǵan salymshy bar, onyń 4 myńnan astamy elordada turady.
«Sońǵy eki jylda quqyq qorǵaý organdary zańsyz qarajat jınaǵany úshin 300-den astam kompanııany ákimshilik jaýapkershilikke tartyp, olarǵa 250 mln teńgege aıyppul salypty. ıAǵnı, orta eseppen alǵanda, bir kompanııaǵa 800 myńnan sál asatyndaı aıyppul salynǵan. Bul degenińiz bir páterdegi 2 sharshy metriniń baǵasy ǵana. Al, keltirilgen zalal 30 mlrd teńgeden asty. Aıyppul – 250 mıllıon, zalal 30 mıllıard. Bul paradoks emes pe?»,- dedi Gennadıı Shıpovskıh.
Bul turǵyda senator Úkimet basshysy Álıhan Smaıylovtyń atyna joldaǵan saýalynda óziniń birqatar usynysyn joldady.
«Úleskerlerge keltirilgen shyǵyndar kúdiktiler esebinen tolyq óndirilmeı, basym bóligi memleket jaǵynan óndirilip jatyr. Osy máseleni eskere otyryp, qurylys kompanııalaryna qoıylatyn talaptar men memlekettik baqylaýdy kúsheıtý qajet. Kompanııa turǵyn úıdi kelisimshartta kórsetilgen merzimde tapsyrmasa, úleskerlerdiń páter jaldaý aqysyn sol kompanııalarǵa mindetteý kerek. Qurylys kompanııalaryna is qozǵalǵan sátte, sol kompanııalardy jarnamalap júrgen túrli blogerler men tanymal tulǵalardyń da jaýapkershiligin arttyrý qajet», - dedi depýtat.
