Qurylys kompanııalary jobalaý-smetalyq qujattamadan aýytqysa, úleskerlerge aqsha aıyrmasyn qaıtarady

ASTANA. KAZINFORM – Qazaqstandyq qurylys kompanııalary turǵyn úı aýdany málimdelgen kólemnen 1,5%-ǵa azaıtylǵan nemese ulǵaıtylǵan jaǵdaıda úleskerlerge aqsha aıyrmasyn qaıtarýǵa mindetteledi. Oǵan qatysty buıryq jobasy «Ashyq NQA» portalynda jarııalandy. 

«Ýákiletti kompanııa qurylys alańynyń azaıýyna nemese ulǵaıýyna ákeletin jobalaý-smetalyq qujattamadan jáne sharttan aýytqyǵan jaǵdaıda jaýap beredi. Biraq, qurylys alańy 1,5%-ǵa deıin azaıyp nemese ulǵaıtylsa sharttan aýytqýshylyq bolyp sanalmaıdy», - delingen qujat jobasynda. 

Sondaı-aq, buıryq jobasynda qurylys kompanııalary qandaı jaǵdaıda úleskerlerge aıyrmashylyqty óteıtini aıtylǵan. 

«Satyp alynatyn jalpy alańnyń 1,5%-dan astamǵa azaıtylǵany kórsetilgen jobalaý-smetalyq qujattamadan aýytqý jaǵdaıynda ýákiletti kompanııa úleskerge qurylystyń aýdanyna qaraı naqty aıyrmany óteıdi. Al qurylys aýdany 1,5%-dan astamǵa ulǵaıtylǵany kórsetilgen jobalaý-smetalyq qujattamadan aýytqý jaǵdaıynda ýákiletti kompanııa úleskerge ulǵaıtylǵan aýdanynyń 50% aıyrmasyn óteıdi», - dep túsindirgen buıryqta. 

Atalǵan qujat jobasy 28 tamyzǵa deıin kópshiliktiń talqysyna usynylyp otyr.

Aıta keteıik, buǵan deıin qurylysy bitpegen úıdiń qujattaryn qalaı tekserý kerektigin túsindiretin resmı nusqaýlyqty jarııalaǵan bolatynbyz.