Qurylys kompanııalary men ákimdikter arasyndaǵy memorandýmdardy túgendep shyǵý kerek — V Ulttyq quryltaı

QYZYLORDA. KAZINFORM — V Ulttyq quryltaıda qurylys kompanııalarynyń ákimdikterge bergen ýádesi oryndalmaı jatqany problema retinde kóterildi. Quryltaı múshesi Marat Shıbutov ýádesin oryndamaıtyn kompanııalarǵa qomaqty aıyppul salý kerek dep otyr.

— Meni birinshiden, qurylys salýshylardyń jaýapkershiligi máselesine toqtalǵym keledi. Kópshilikke arnalǵan turǵyn úı salar kezde qurylys kompanııalary ákimdiktermen áleýmettik ınfraqurylym salý týraly memorandýmdar jasaıdy. Alaıda, bul memorandýmdardy buzǵany úshin jaýapkershilik bolmaǵandyqtan, ýádeler oryndalmaı qalyp jatyr. Demek, ár aımaqta josparǵa enip ketken ondaǵan nysan salynbaı qalyp otyr. Eger sol memorandýmdar oryndalǵan bolsa, qazir qajet bolyp otyrǵan oqýshy oryndaryn túgel jabar edi. Statıstıkany qarasaq, bıyl bilim men ǵylymǵa 900 mıllıard teńge bólindi. Ótken jyly 1 trıllıon 400 mıllıard teńge bolǵan. Bıyl nege az? Sebepterdiń ishinde osy ýáde etilgen áleýmettik nysandar da bar. Bulaı bolmaıdy, — dedi ol.

Ulttyq quryltaı múshesi osyndaı memorandýmdardy tolyq túgendep shyǵý kerek degendi aıtty.

— Tym bolmasa, Astana, Almaty, Shymkent qalalarynda osyndaı túgendeý júrgizip, naqty jáne qatań sharalar qabyldaý qajet. Olar osy ýáde etilgen ınfraqurylymdy, negizinen mektepterdi salǵanǵa deıin jańa obektiler salýǵa ruqsat bermeý kerek jáne qoldanystaǵy obektilerdi paıdalanýǵa bermeý qajet. Ýáde etilgen áleýmettik mindettemelerdiń bári sáýlet-josparlaý tapsyrmasynda bolý kerek. Tipti, ony oryndamaǵany úshin ýáde etken nysannyń qunyna teń aıyppul salýǵa da bolady. Qurylystan túsken aqshany Dýbaıdaǵy záýlim saraılarǵa emes, áleýmettik ınfraqurylymǵa jumsasyn, — dedi Mart Shıbutov.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalaıtynyn jazdyq.